PARCEM isaba ko ubutungane bwofasha gukingira agateka ka zina muntu

Yanditswe na Vianney BIKORIMANA
Kuya 28 Nyakanga 2017 saa 01:55
Yasomwe : 4041
0 0

Ishirahamwe PARCEM ryiyemeje gukangurira abarundi guhindura ingendo n’ivyiyumviro risaba ko umwaka w’ubutungane uheruka gutanguzwa n’umukuru w’igihugu c’Uburundi woba umwaka wo kwongereza ishaka hamwe no gufata ingingo zikomeye kugira igisata c’ubutungane kibone guterera ubutungane bw’igihugu mu gukingira agateka ka zina muntu.

Faustin NDIKUMANA arongoye PARCEM avuga ko uwu mwaka woba uw’inguvu nshasha kugira hagire igihindutse mu gushikiriza ubutungane abanyagihugu, Reta ikabwirizwa gufata nka nkama ko agateka ka zina muntu ariyo ikabazwa.

Muri PARCEM basaba ko hotangwa inyigisho ku bajejwe intwaro kugira bamenye akarimbi kabo, kuko hariho abashaka gukora ivyo batarekuriwe bitwaje amabanga ya Reta bajejwe, bakabikora atacamira.

Faustin NDIKUMANA abandanya avuga ko abarenze amategeko bitwaje amabanga yabo ko bohanwa hisunzwe amategeko kandi ko ivyegeranyo bisohoka bivuga ibijanye n’agateka ka zina muntu ko igikuru kitoba kuvyiyamiriza, ariko ababijejwe boraba ivyavuzwemwo kuko ivyaha vyakozwe biba vyakozwe ata gihinduka gihaba.

Faustin NDIKUMANA avuga ati : «Ivyegeranyo bisohoka igikuru si ukuvyiyamiriza ariko ni ukuraba ibiba vyavuzemwo kuko ivyakozwe ari bibi biguma ari bibi, uwafashe ku nguvu aguma yitwa ko yafashe ku nguvu, ari uwishe aguma ari umwicanyi. Igihambaye ni ukumenya ukuri uwabikoze agahanwa. Nico gihambaye.»

JPEG - 35 ko
Faustin NDIKUMANA, umukuru w’ishirahamwe PARCEM

PARCEM isaba ko hokwama haba umuco mu bikorwa vy’ubutungane, amabohero akagenderwa kugira uko abanyororo bafashwe bimenyekane.

Kugira igisata c’ubutungane gikore neza, Faustin NDIKUMANA asaba ko igiturire cotuzwa kugira bifashe ubutungane gukora neza, kuko, kubwa Faustin NDIKUMANA, aho igiturire ciraye agateka ka zina muntu kadashobora kugenda neza.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha