Uburyo buke bwatumye igisata kijejwe gukinga impanuka kidashika kw’ihangiro

Yanditswe na Callixte Carpe NDIKUMANA
Kuya 1er mars 2018 saa 02:53
7155
0 0

Umuyobozi mukuru w’igisata kijejwe gukinga impanuka no gufasha abo zashikiye mu Burundi, amenyesha ko ico gisata kitashoboye gushika kw’ihangiro cari cihaye mu mwaka wa 2017. CP Antoine NTEMAKO arongoye ico gisata yavuze ko kuba batashitse kw’ihangiro, vyavuye ku buryo buke bwo gukoresha bari bafise.

Mw’ijambo yashikirije, mu gihe hahimbazwa umunsi mpuzamakungu wahariwe gukinga impanuka no gufasha abo zashikiye, kur’uyu wa kane igenekerezo rya 1 Ntwarante 2018, CP Antoine NTEMAKO yavuze ko ibihugu bihimbaza uwo munsi, kubera intumbero zibiri nyamukuru.

Umuyobozi mukuru w’igisata kijejwe gukinga impanuka no gufasha abo zashikiye mu Burundi, yamenyesheje ko uwo munsi uhimbazwa mu ntumbero yo kumenyesha abanyagihugu akamaro ko gukinga impanuka n’icokorwa mu gufasha abo zishikira.

CP Antoine NTEMAKO, umuyobozi mukuru w’igisata kijejwe gukinga impanuka no gufasha abo zashikiye mu Burundi, yavuze kandi ko, uwo munsi uhimbazwa mu ntumbero yo gutera intege igisata kijejwe gukinga izo mpanuka no gufasha abo zashikiye.

Mu migambi ya kazoza bafise, umuyobozi mukuru w’igisata kijejwe gukinga impanuka no gufasha abo zashikiye mu Burundi, CP Antoine NTEMAKO yavuze ko ibintu bitatu nyamukuru arivyo bigiye gukorwa.

« Tugiye kubandaniriza aho ibikorwa vyari bigeze, tugiye gushiraho igisata co mu mazi kijejwe gukinga izo mpanuka, tugiye gushiraho kandi igisata kijejwe kwegeranya ivyononekaye muri izo mpanuka. »

Mw’ijambo ryiwe, umwunganirizi w’umushikiranganji w’umutekano, CP NTAKAVURA Serges, yagarutse ku biharuro vy’ivyononekaye kuva ku ntango y’irima ry’umwaka wa 2018.

Yavuze ko abantu 49 bitavye Imana, inzu 2933 zirononekara, inzu 1225 n’ibirase 200 zirasambuka, n’amahagitare 14163 y’imirima arononekara.

Umunsi mpuzamakungu wahariwe gukinga impanuka no gufasha abo zashikiye wahimbajwe ku civugo :“Urwego rushinzwe gukinga no gutabara abashikiwe n’ibiza ruri hamwe n’izindi nzego z’igihugu mu gutunganya neza ibikorwa vyo kurwanya ibiza.’’


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha