Umurwi ugira kabiri w’abayoboke ba Zebiya bahora mu Rwanda washikanwe mu Burundi

Yanditswe na Egide NDUWIMANA
Kuya 2 Ndamukiza 2018 saa 04:11
16755
0 0

Umurwi ugira kabiri w’abandi barundi amajana icenda (900) b’abayoboke ba Zebiya NGENDAMUMANA bari bahungiye mu gihugu c’Urwanda bashikanwe mu gihugu c’Uburundi kuri uwu wa mbere. Uwo murwi ugira kabiri ugizwe n’abagera ku 517 bakiriwe ku Kanyaru yo haruguru, ku rubibe Uburundi buhana n’Urwanda, hamwe n’abagera ku 383 bakiriwe ku mupaka wo ku Ruhwa mu ntara Cibitoke.

Umushikiranganji w’imigenderanire y’Urwanda n’ayandi makungu Louise MUSHIKIWABO amenyesha ko icatumye impunzi ziheruka kwakirwa zivuye mu gihugu ca Reta iharanira intwaro rusangi ya Kongo zitahukanwa, ari uko zanse gukurikiza amategeko y’igihugu c’Urwanda hamwe n’amategeko mpuzamakungu agenga impunzi.

Nk’uko tubisoma mu rwandiko inomero 161/09.01/CAB.MIN/18 uwo mushikiranganji yandikiye mugenzi we w’Uburundi kw’igenekerezo rya 31 Ntwarante 2018, Louise MUSHIKIWABO amenyesha ko abo barundi banse guharurwa hakoreshejewe uburyo bwa none bongera banka ko abana babo bari munsi y’imyaka 5 bahabwa urucanco.

Uwo mushikiranganji w’Urwanda avuga ko izo mpunzi z’abarundi zashikirije ko ukwemera kwabo kutabibarekurira, zisaba ahubwo ko zotahukanwa mu Burundi.

Mu giporisi c’Uburundi siko babibona. Babicishije ku rubuga rwabo rwa twitter, bavuga ko izo mpunzi z’abarundi zirukanywe kuko zanse kwinjizwa n’abasirikare b’Urwanda mu mirwi itera Uburundi.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha