Umushikiranganji NTUNZWENIMANA yahagaritse itegeko rya OTRACO

Yanditswe na Vianney BIKORIMANA na Egide NDUWIMANA
Kuya 25 Myandagaro 2017 saa 10:59
Yasomwe : 17991
1 0

Umushikiranganji ajejwe gutwara abantu n’ibintu asaba ishirahamwe OTRACO (Office du Transport en Commun) kurindira mw’ishirwa mu ngiro y’ingingo iryo shirahamwe ryari ryafashe y’ukuduza amafaranga yo gusuzumisha imiduga (Controle Technique).

Mw’ikete umushikiranganji Jean Bosco NTUNZWENIMANA ajejwe gutwara abantu n’ibintu yarungikiye umuyobozi w’ishirahamwe OTRACO, yamumenyesheje ko yihweje ivyasambwe mu nama nkuru y’uburongozi hamwe n’ibiciro bishasha vyo gusuzumisha imiduga hisunzwe uko bikorwa no mu bindi bihugu vyo mu muryango wa Afirika y’Ubuseruko, ubuyobozi bwa OTRACO ko bwoba burabangiye ku ngingo buheruka gufata yo kuduza ivyo biciro.

Jean Bosco NTUNZWENIMANA asaba kandi umuyobozi mukuru wa OTRACO gutegura ibiciro vyo gusuzumisha imiduga yisunze ibikoresho basanzwe bafise muri iryo shirahamwe hamwe n’uko batunganya ivyo bikorwa kugira bizoce birungikirwa inama nshikiranganji nayo ivyihweze imbere y’uko bishirwa mu ngiro.

JPEG - 43 ko
Jean Bosco NTUNZWENIMANA, Umushikiranganji ajejwe gutwara abantu n’ibintu

Tubibutse ko ishirahamwe rijejwe gutwara abantu n’ibintu (OTRACO) ryaheruka kumenyesha ko amafaranga yahora atangwa mu gusuzumisha ubuhinga bw’imiduga (Control technique) yadugijwe.

Nk’uko biri mw’itangazo ryasohowe na OTRACO, ayo mafaranga yari yadugijwe uku gukurikira. Imodoka (voiture, Jeep hamwe na camionnette) zotangishijwe amafaranga ibihumbi 50.

Imodoka yo mu bwoko bwa "Bus" igatangishwa amafaranga ibihumbi 35, ikamyo ipima hagati y’itoni 3 na 15 ikariha ibihumbi 70, mu gihe iyirenza itoni 15 yotangishijwe ibihumbi 100. Ipikipiki nayo yorishe ibihumbi 10.

Mw’ishirahamwe ry’abaguzi ABUCO barashima iyo ngingo y’umushikiranganji w’ugutwara abantu n’ibintu, kuko iyo ishirwa mu ngiro yari kugira ingaruka mbi ku bisata bitandukanye vy’ubuzima bw’igihugu c’Uburundi.

Noel NKURUNZIZA, umukuru w’ishirahamwe ABUCO avuga ko umuyobozi mukuru wa OTRACO atari akwiye kuvuga ko ibiciro vy’ugusuzumisha imiduga bidugijwe ku rugero rw’ibindi bihugu vyo muri Afrika y’ubuseruko, kuko n’ubuhinga butangana muri ivyo bihugu. Uwo arongoye ABUCO akavuga kandi ko bidatahuritse ingene ibiciro vyonganishwa mu gihe n’imishahara itangana ku bakozi bo mu bihugu bigize ishirahamwe rya Afrika y’ubuseruko (EAC).


Kumenyekanisha

1
nephtalie 25-08-2017 à 12:02

ico ni ikintu ciza ni ivyerekana ko igihugu cacu gifise abategetsi beza bakurikirana amabanga bajejwe .Imana ibaje imbere

2
Ngendanzi 25-08-2017 à 12:00

Uyo mukozi wa Otraco ashaka ayo acikana nk’uko tubimenyereye.

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha