Urwaruka 350 rwitezwe mw’ihuriro rizobera i Bujumbura

Yanditswe na Egide NDUWIMANA
Kuya 8 août 2017 saa 11:49
Yasomwe : 4212
0 0

Ishirahamwe AJAP Africaine rimenyesha ko ihuriro rya mbere ry’urwaruka ku rwego rwa Afrika rizobera i Bujumbura, nk’uko bitegekanijwe ku magenekerezo ya 21 gushika kurya 25 Myandagaro 2017.

Iryo huriro rizoba ku civugo : "Umugabane wa Afrika, urwaruka rwiyemeje kugira ico rukora : Ni uruhe ruhara urwaruka rwa Afrika rwoterera maze ngo turonke Afrika itekanye, iteye imbere muvy’ubutunzi, ikomeye kandi irangwa n’ubumwe ?"

Mw’ishirahamwe AJAP Africaine bamenyesha ko iryo huriro rifise ihangiro nyamukuru ryo gushiraho urwego urwaruka rwa Afrika ruhanahaniramwo ivyiyumviro vyubaka mu ntumbero yo gushiraho igitabo kijanye n’ivyo urwaruka rwoterera mu gishira mu ngiro amahangiro y’iterambere rirama muri Afrika hamwe no gukura Afrika ku mugabane w’iibihugu bikenye mu kirongo co gushika mu 2030.

Nk’uko bivugwa na Eric NSENGIMANA, umukuru w’ishirahamwe AJAPA Africaine, iryo huriro rirafise n’amahangiro y’ukurarikira urwaruka gutsimbataza amahoro n’umutekano muri Afrika, hamwe n’ugutorera umuti ibibazo biciye mu kwumvikana, kurarikira urwaruka gutsimbataza intwaro rusangi, kwubahiriza agateka ka zina muntu, kwubahiriza ubwisanzure mu gushikiriza ivyiyumviro, gushinga ikigega kijejwe kuziganiriza urwaruka, guhamagarira abategetsi guha ikibanza urwaruka mu nzego zijejwe gufata ingingo, hamwe n’ukwigisha urwaruka kwironderera ubuzi.

JPEG - 49.1 ko
Eric NSENGIMANA, umukuru w’ishirahamwe AJAP Africaine

Urwaruka rugera ku 350 ruvuye mu bihugu bitandukanye vya Afrika nirwo rwitezwe i Bujumbura muri iryo huriro rizotangura kw’igenekerezo rya 21 Myandagaro 2017. Urwaruka rwo mu Burundi rukazoserukirwa na batatu ku ntara imwe yose muri 18 zigize igihugu c’Uburundi.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha