Abakenyezi bo mu nzego zifata ingingo baracari bake mu Burundi

Mu gihe bariko bararaba urugero umukenyezi aserukiweko mu nzego zifata ingingo, Perpetue Kanyange ari mu runani rw’abasanzwe bafashanya mu guteza imbere agateka k’abakenyezi yamenyesheje ko umukenyezi w’umurundikazi aserukiwe ku bice 17,52 kw’ijana kandi ibitegekanijwe n’amategeko ari ibice 30 kw’ijana.

Umukenyezi w’umurundikazi aserukiwe ku gice 1,47 kw’ijana mu nzego z’umutekano. Mu ntwaro aserukiwe ku bice 17,6 kw’ijana. Mu guteza imbere ubutunzi, umukenyezi aserukiwe ku bice 20,15 kw’ijana. Ariko naho biri uko, ivyo bitigiri biracari bito bagereranije n’ivyanditse mu mategeko nko mw’ibwirizwa shingiro, no mu masezerano ya Arusha, yompi ategekanya ko umukenyezi yoserukirwa ku bice 30 kw’ijana.

Ishirahamwe SPPDF (Synergie des Partenaires pour la Promotion des Droits de la Femme) ryibutsa ko Uburundi bwateye igikumu ku masezerano akingira agateka k’abakenyezi, rigasaba rero ko inzego zose za Reta gukurikiza ivyo ziyemeje mu guteza imbere umukenyezi, na cane cane muri kino gihe himirije amatora yo mu mwaka w’2015.