Basaba gufashwa kuko imvura ibarembeje aho bahungiye

Inzara, imvura ku mugongo nivyo bibangamiye abanyagihugu bavuye ku Mutambara muri komine ya Rumonge, ubu basanzwe bahungiye ku biro vy’umuhuza w’abarundi Mohamed Rukara.

Abo banyagihugu bakaba bataye izabo baza i Bujumbura, inyuma y’abo bamenyeshereje ko hari umurwi w’abantu bahawe amabati,nabo barabima kandi yari agenewe abo bahungutse bava mu gihugu ca Tanzaniya. Abo banyagihugu rero basaba amabati n’amatongo,bakavuga ko batacizeye umushikiranganji w’ugufatana munda Korotirida Niragira,kuko ivyo ababwira adaheza ngo abishire mu ngiro.

Basaba umuhuza w’abarundi Mohamed Rukara kubafasha ikibazo cabo kigatorerwa umuti. Umwe mubaserukira abo banyagihugu bari ku biro vy’umuhuza akaba asaba abagiraneza ko bobagarukirako, kuko ikigoyi kibarembeje, imibu eka na zimwe mu ndwara z’ugucibwamwo zikaba zatanguye gufata abana bakiri bato.