Accueil > Amakuru > u Burundi > Basaba ko isoko yabo yokingirwa ntize itokombere nk’isoko nkuru ya (...)
Basaba ko isoko yabo yokingirwa ntize itokombere nk’isoko nkuru ya Bujumbura
vendredi 24 Nzero 2014
Abadandariza mw’isoko yo mu Ruvumera bamenyesha ko bafise amakenga y’aho badandariza mu gihe amabarabara yaga, bigatuma umunsi iyo soko yofatwa n’umuriro bizogorana ko kizimyamwoto izimya.
Ivyo abo badandaza bakabivuga baravye ukwo amasoko amwe amwe yo mu gihugu aza arasha, ibiriyo bigatokombererayo. Abo badandaza rero bakaba bateye akamo kugira iyo soko ibe irakingirwa hakiri kare. Bavuga ko utubarabara twaga cane, ku buryo kizimyamwoto itoronka aho ica, kugira izimye.
Abadandariza aho mu Ruvumera bakaba benshi ari abahora mw’isoko nkuru ya Bujumbura itarasha ngo itokombere, aho bavuga ko bahahamutse baravye uko bacikiye amaboko muri iyo soko. Bakabandanya basaba ko isoko yo kuri COTEBU yonyarutswa kugira batangure kuyikoreramwo, nk’uko vyashikirijwe na Reta, bakimara kuburira utwabo mw’isoko nkuru ya Bujumbura, kugira barabe ko kunyundanyundira aho mu Ruvumera vyohera.
IGIHE
