Bujumbura : kutamenya amategeko y’amabarabara biri mu biteza amasanganya

Amasanganya mu gisagara ca Bujumbura aguma yibonekeza, mu gihe ibimenyetso bimwe vyategerezwa kwerekana aho abamaguru baca bimwe bitaboneka neza, ibindi navyo ntivyubahirizwe n’abagendesha imiduga.

N’aho mu giporisi bamenyesha ko imivuduko y’imiduga igiye guhanwa, bikaboneka ko ivyo ahubwo bidakunda gushirwa mu ngiro, co kimwe n’abagendesha imiduga baborewe, abandi nabo bagaha imiduga abana batarakwiza imyaka, mu gihe hari n’abadi bapfa kugendesha imiduga batazi amategeko y’amabarabara. Ivyo bikemezwa n’amasanganya menshi aba hama mw’ijoro canke ku murango.

Bamwe mu bagendesha imiduga bavuga ko uruja n’uruza rw’amapikipiki hamwe n’amakinga mu gisagara ca Bujumbura, biri mu bitera amasanganya. Amakinga canke amapikipiki vyari vyarabujijwekwinjira mu gisagara hagati ca Bujumbura, ariko bikaboneka ko abagendesha ayo makinga hamwe n’amapikipiki binjira bakoresheje utundi tuyira. Isanganya ryabereye kw’ibarabara ryitiriwe JRR, aho umuduga Toyota RV4, n’ipikipiki vyagonganye, vyibonekeje ko bamwe mu banyonga yaba imiduga canke amapikipiki bataramenya neza amategeko y’amabarabara.