Misiri irabandanya gukomeza imigenderanire n’Uburundi

Ubushikiranganji bujejwe ivy’umutekano mu gihugu ca Misiri buripfuza gukorana cane n’Uburundi mu guhuza abahinga bo muri ivyo bihugu bibiri kugira bigire hamwe ivyokorwa mu gukomeza amahoro n’umutekano.

Mu gatondo ko kuri uwu wa mbere igenekerezo rya 12 Nzero 2015, icegera ca kabiri c’Umukuru w’igihugu, Gervasi Rufyikiri yahaye umubonano uwuserukira igihugu ca Misiri mu Burundi, M.Yasser Ali Ragab Ali. Muri uwo mubonano bakaba bagarutse ku bikorwa vyo gufashanya hagati y’ivyo bihugu bibiri.

Abo bategetsi babiri bakaba biyemeje gusubira kunagura ibindi bisata bitandukanye, cane cane muvy’uburimyi kuko igihugu ca Misiri gisanzwe gifise ubuhinga buhanitse bwo kugazura no kuvomera imirima, gukomeza igisata c’amagara y’abantu, ivy’inyubako, nk’uko vyamenyeshejwe n’icegera ca kabiri c’Umukuru w’igihugu, Gervasi Rufyikiri.
Hari n’abagwizatunga bo mu gihugu ca Misiri biteguye kuzoza gutangura ibikorwa vyabo mu Burundi, mu gisata c’umuyangankuba uvuye ku mishwarara y’izuba.

Mukamenya ko bwari bubaye ubwa mbere icegera ca kabiri c’Umukuru w’igihugu yakira uwo aserukira igihugu ca Misiri mu Burundi kuva atanguye imirimo, kakaba kabaye n’akaryo ko guca amwipfuriza ikaze n’Umwaka mwiza.