Integuro 9 z’amategeko mu nama nshikiranganji mu minsi ibiri

Mu bikorwa vy’inama nshikiranganji bitegekanijwe kumara iminsi ibiri biriko biraba, integuro z’amategeko icenda nizo ziriko zirirwa.

Muri iyo nama nshikiranganji rero yatanguye kuri uyu wa gatatu igenekerezo rya 13 gushika ku rya 14 Munyonyo uyu mwaka irongowe n’umukuru w’igihugu Petero Nkurunziza, hategekanijwe ko barabira hamwe integuro y’itegeko ryinjiza Uburundi mu mwaka w’1961 mu masezerano y’i Appostille, eka ndetse bakaba bazakurabira hamwe integuro y’isubiramwo ya protocole y’amahoro n’umutekano mw’ishirahamwe ry’Afrika y’Ubuseruko.

Mu gisata c’indero integuro zitatu zirirwa muri izo, harimwo integuro y’integuro igena inyigisho z’inyuma y’itangura ry’ishure nshingiro, integuro y’itunganywa rishasha rya kaminuza ISGE « Institut Superieure de Gestion des Entreprises », n’igisata kiraba agafashanyo n’imyimenyerezo mu mashure yisumbuye na za kaminuza amategeko akigenga agiye kuzosubirwamwo.

Mu gisata c’ubutunzi, iyo nama nshikiranganji ikaba irabira hamwe itunganywa ry’ingene ubutunzi bwa reta bukoreshwa na baburamatari, abahanuzi babo, abasitanteri eka n’abahanuzi babo. Hari n’iyindi nteguro ishiraho ama faranga reta izokoresha muri uyu mwaka buca utangura w’2014, bace batanga n’icegeranyo c’ayakoreshejwe mu mwaka w’2012.