Kirengane : Bantahonikora bafashishijwe ibirato n’ibindi

Abanyagihugu bo muri komine ya Rugazi ku musozi wa Kirengane bahawe imfashanyo igizwe n’ibirato, impuzu z’ishure ku banyeshure n’umuceri hamwe n’ibitenge, ivyo vyose bakaba babironkejwe na Nyenicubahiro umukuru w’igihugu c’Uburundi Petero Nkurunziza.

Abanyeshure bashika ku majana atanu nibo baronkejwe iyo mfashanyo igizwe n’impuzu z’ishure, ibirato vy’ukwambara, mu gihe abandi 298 bagizwe n’abapfasoni bageze mu zabukuru nabo, baronkejwe ibitenge vy’ukwambara. Abandi banyagihugu nabo, bagizwe na bantahonikora, baronse umuceri ugizwe n’ibiro icumi. Iyo mirwi yose y’abantu, ikaba yagaragarije umukuru w’igihugu, umunezero bafise, inyuma y’uguhabwa iyo mfashanyo.

Umukuru w’igihugu kandi, akaba yabandanirije ico gikorwa ciwe c’ugutanga imfashanyo mu bice vya Gako, Kibuye na Kirengane mu makomine ya Musigati na Bubanza. Igice kinini rero c’abagiye bararonswa izo mfashanyo, kikaba kigizwe n’abanyagihugu bagiye barahura n’ingorane z’uguhunga, n’izindi ngorane iyo ntara ya Bubanza yagiye irahura nazo.