Musaga : Iminsi ibaye ibiri amazi ari nk’umuzi w’ibuye

Igice kinini ca komine ya Musaga ntikigira amazi meza haraheze iminsi ibiri, icabitumye akaba ari umuyagankuba udakwiriye ahasanzwe hari umugezi mukuru utanga amazi muri iyo komine.

Amakuru ava muri Regideso akavuga ko bariko barakora ibishoboka vyose, kugira ingorane y’amazi muri iyo komine ya Musaga itorerwe umuti vuba. Desire Nsengiyuma umuyobozi w’igisata c’amazi mw’ishirahamwe Regideso, akaba amenyesha ko bariko barigira hamwe ico kibazo n’igisata kijejwe umuyagankuba muri iryo shirahamwe. Asaba abanya Musaga bose gutekana ko ico kibazo kibaraje ishinga nabo.

Mukamenya ko ivyo bishitse, mu gihe hari hasanzwe hari ibice bimwe vy’igisagara ca Bujumbura abanyagihugu bamaze kwandura ikiza ca cholera. Komine ya Musaga nayo nyene hamwe ico kibazo kitova mu nzira c’ikena ry’amazi, abanyagihugu baho bakavuga ko ico kiza kitobasiga inyuma, na rirya iyo komine iri mu makomine y’igisagara ca Bujumbura abamwo abantu benshi, kandi mu buzima butandukanye.