Reta y’Ubufaransa yatanze imfashanyo y’ibikoresho kubashikiwe n’ikiza c’imvura

Ubuserukizi w’igihugu c’Ubufaransa hano mu Burundi bwatanze imfashanyo y’ibikoresho vyo mu nzu, bigizwe n’uburengeti bwo kwifuka, ivyombo vyo gutekesha, ibisakazo, n’ibindi kubahuye n’ikiza c’imvura co kuwa 9 ushira uwa 10 Ruhuhuma 2014.

Mw’itangazo ubuserukizi w’igihugu c’Ubufaransa hano mu Burundi bwasohoye, abategetsi b’ubwo buserukizi bamenyesha ko, babajwe n’ivyashikiye Uburundi, ku mvura y’isegenya yaguye kuwa 9 ushira uwa 10 Ruhuhuma 2014 yononye ibitari bike n’abantu insinzi bahasize ubuzima. Umukuru w’igihugu c’Ubufaransa, Francois Hollande akaba yamenyesheje umukuru w’igihugu c’Uburundi, Petero Nkurunziza ko yifadikanije hamwe n’umubabaro n’Uburundi ku vyahononekariye vyose, na cane cane kubahasigiye ubuzima.

Francois Hollande akaba yahojeje imiryango y’ababuze ababo, yongera arungika n’imfashanyo mu kugarukira abo bose bahaburiye ivyabo n’ababo, kuri ico kiza c’imvura co kuwa 9 Ruhuhuma. Iyo mfashanyo igizwe n’amatoni atanu y’uburengeti bwo kwifuka, ibikoresho vyo mu gikoni bitandukanye, ibisakazo, amabido y’amazi, n’ibindi Reta y’Ubufaransa yatanze ikaba yayishikirije ishirahamwe Croix Rouge rikorera mu Burundi, kugira ribishikirize abo bahuye n’amakuba bari muma site begeranijwemwo. Bikaba bitegekanijwe ko iyo mfashanyo ishirahamwe Croix Rouge iyishikirizwa uno munsi wa kane wa 27 Ruhuhuma 2014, kubegeranijwe ku kibuga citiriwe Don Bosco kiri ku Buterere. Uwuserukira igihugu c’Ubufaransa m’Uburundi, Gerrit van Rossum hamwe n’umunyamabanga mukuru wa croix Rouge bakazoba bahishikiye mu gushikiriza izo mfashanyo abashikiwe n’ivyago.

Mwomenya kandi ko Ubuserukizi bw’igihugu c’ubufaransa hano m’Uburundi bugiye no gushigikira ikigo cakira abafise ingorane zo mu mutwe co mu kamenge, CNPK (Centre Neuropsychiatrique de Kamenge). Bukaba bugiye gufasha ico kigo gukurikirana abashikiwe n’ivyago haba mu guhahamuka canke mu guta ubwenge bivuye kuri ico kiza c’imvura.