RSF isaba ko abahohoteye umumenyeshamakuru Esdras Ndikumana borengutswa

Inyuma y’ihohoterwa ryakorewe umumenyeshamakuru w’iradiyo y’abafaransa RFI n’itororokanirizo ry’amakuru AFP mu Burundi Esdras Ndikumana,ishirahamwe ry’abamenyeshamakuru batagira imbibe RSF rimenyesha ko ritangazwa no kuba ata muntu n’umwe arahagarikwa mu bakoze ico caha.

Clea Kahn-Sriber ajejwe akarere ka Afrika mw’ishirahamwe ry’abamenyeshamakuru batagira imbibe RSF avuga ko bitangaje kuba haheze ikiringo cababa ukwezi ata muntu n’umwe ararengutswa imbere y’ubutungane kubera guhohotera umumenyeshamakuru Esdras Ndikumana.

Uwo aserukira RSF mu karere ka Afrika amenyesha ko amakuru yo kwizerwa bafise,yerekana neza ko umumenyeshamakuru Esdras Ndikumana yakubiswe n’abakozi b’igendereza,ivyo bigasigura ko ababikoze bazwi.

RSF igasaba ko imvugo yojana n’ingiro,gutyo abagirizwa ico caha bagahamagarwa imbere y’ubutungane,bakabazwa kandi bagahagarikwa.

Haraheze indwi zibiri ibiro vy’umukuru w’igihugu bibicishije mw’itangazo, bimenyesheje ko umukuru w’igihugu wenyene ubwiwe yabonanye n’umukuru w ‘igendereza akamubaza ku bijanye n’ihohoterwa rya Esdras Ndikumana,kugira ababikoze bakurikiranwe kandi bahanwe hisunzwe amategeko.

Mwomenya ko Esdras Ndikumana yahohotewe kw’igenekerezo rya 2 Myandagaro 2015,igihe yari ahari hahejeje kurasirwa Lt Gen Adolphe Nshimirimana yahoze arongoye igendereza ry’Uburundi.