Ubushikiranganji bw’imigenderanire: Inzego zibijejwe nizo zizokuraho impari

Ubushikiranganji bw’imigenderanire y’Uburundi n’ayandi makungu bumenyesha abarundi n’amakungu ko sentare yubahiriza ibwirizwa nshingiro ari rwo rwego rwonyene rushobora gukuraho impari ziriho, muri kino gihe zijanye n’ingingo zimwe zimwe zo mw’ibwirizwa nshingiro zidasomwa kumwe.

Mw’itangazo basohoye kuri uno wa 23 Ndamukiza uno mwaka, iminsi ibiri gusa imbere y’uko ikoraniro kaminuza ry’umugambwe CNDD-FDD riba , Ubushikiranganji bw’imigenderanire y’Uburundi n’ayandi makungu bumenyesha ko burajwe ishinga n’umwitwarariko w’abo bose bariko bahamagarira iyubahirizwa ry’ibwirizwa nshingiro hamwe n’amasezerano y’ i Arusha, mu ntumbero yo gutegura amatora yigenga ,arimwo bose ,arangwamwo umutekano ,intwaro rusangi kandi akozwe mu muco.
Ubushikiranganji bw’imigenderanire no gufashanya hagati y’Uburundi n’ayandi makungu bumenyesha ko Reta y’ Uburundi, yiyemeje kubumbatira intwaro rusangi hamwe no kwubahiriza ibwirizwa nshingiro ry’Uburundi.

Muri iryo tangazo kandi bagaruka kwerekana ko ibwirizwa nshingiro ryanditswe mu kiringo c’imfatakibanza , Ku vyerekeye impari zihari zo kudasoma ingingo zimwe zimwe ziri mw’ibwirizwa shingiro nk’ingingo ya 96 na 302 ari nazo zerekana ingene umukuru w’igihugu atorwa, Ubushikiranganji bw’imigenderanire y’Uburundi n’ayandi makungu bubandanya bwerekana ko ivyari mu masezerano y’i Arusha vyashizwe mw’ibwirizwa nshingiro, bisigura ko ibwirizwa shingiro riri hejuru y’amasezerano y’ i Arusha.

Ubushikiranganji bw’imigenderanire y’ Uburundi n’ayandi makungu bumenyesha aburundi n’amakungu ko sentare yubahiriza ibwirizwa ishingiro arirwo rwego rwonyene rushobora gusigura ibwirizwa nshingiro nk’uko ingingo ya 228 mu gace kayo ka gatatu, k’iryo bwirizwa nshingiro nyene. Bakavuga ko iyo ngingo yunganirwa n’iya 225 yo muri iryo bwirizwa nshingiro nyene, nk’uko babandanya babishikiriza muri iryo tangazo.

Ubushikiranganji bw’imigenderanire y’Uburundi n’ayandi makungu busaba amakungu yafashije cane mu biganiro vyatumye Uburundi buronka amahoro, kuguma hafi ya Reta, hamwe no kubashigikira mu mfashanyo zose zikenewe kugira amatora Uburundi bwimirije aze agende neza.