Umwe mu bagize sentare y’ubahiriza ibwirizwa nshingiro mu buhungiro

Icegera c’umukuru wa sentare ijejwe kwubahiriza ibwirizwa nshingiro yarahunze igihugu. Sylvere Nimpagaritse yahunze inyuma y’aho asabiwe kwemeza ku nguvu z’ubutegetsi, ko ikiringo ca gatatu ca Petero Nkurunziza cemewe n’amategeko.

Slyvere Nimpagaritse yahunze igihugu kuri uno wa mbere igenekerezo rya 4 rusama. Ibi bishobora gutuma haba ibihinduka mu gihugu inyuma y’aho imyiyerekano yo kwiyamiriza ikiringo ca gatatu ca Petero Nkurunziza iza yaratanguye mu gisagara ca Bujumbura no mu bindi bice vy’igihugu.

Icegera c’umukuru wa sentare ijejwe kwubahiriza ibwirizwa nshingiro yarahunze igihugu.Sylvere Nimpagaritse

Avugana n’umumenyeshamakuru w’iradiyo y’abafaransa RFI imbere y’uko ahunga, Sylvere Nimpagaritse yamubwiye ko afise ubwoba kuko hari abamaze gutangura kumurondera babicishije ku materefone, bamubwira ko atemeje ko umukuru w’igihugu Petero Nkurunziza ashobora gusubira kwitoza ko bishobora guhitana ubuzima bwiwe n’ubwo umuryango wiwe.

Ibwirizwa nshingiro hamwe n’amasezerano ya Arusha

Naho bimeze ukwo, Slyvere Nimpagaritse yavuze ko azi ico akora, hamwe n’uruhara afise muri kahise k’igihugu. Uwo yahora ari icegera c’umukuru wa sentare ijejwe kwubahiriza ibwirizwa nshingiro, avuga ko sentare yatanguye kwiga kuri ico kibazo ku munsi wa kane igenekerezo rya 30 ndamukiza.

Slyvere Nimpagaritse avuga ko bari bane kuri indwi bagize iyo sentare ijejwe kwubahiriza ibwirizwa nshingiro mu Burundi, badashigikiye ikiringo gishasha c’umukuru w’igihugu Petero Nkurunziza kuko kubwiwe kwemeza ico kiringo kwoba ari uguhonyanga ibwirizwa nshingiro n’amasezerano ya Arusha.

Ayo makuru nyene avuga ko ku munsi wa mbere batashoboye kwumvikana baca bigiza inyuma isango ku munsi ukurikira. Ku bwa Slyvere Nimpagaritse, ni kuri uwo munsi nyene haciye hatangura iterabwoba, abahora ari abagenzi baca batangura kuba abansi biwe. Slyvere Nimpagaritse avuga ko abandi batatu barikumwe basangiye iciyumviro co kudatera igikumu ku ngingo yo kwemeza ko umukuru w’igihugu asubira kwitoza, baciye batinyirira ubuzima bwabo baca bemera guhindura ivyiyumviro.

Slyvere Nimpagaritse ati :«Mbajije umutima n’ubwenge bwanje, nafashe ingingo yo kudatera igikumu ku ngingo ifatiwe hanze kandi idakurikije amategeko.»

Amakuru ava mu karere ka Rusizi mu gihugu c’Urwanda yemeza ko uwo yahora ari icegera c’umukuru wa sentare ijejwe kwubahiriza ibwirizwa nshingiro yahungiye mu gihugu c’Urwanda, akaba yakiriwe mu gace ka Bweyeye ari kumwe n’abandi indwi bahunganye harimwo umukenyezi wiwe.

Mwomenya ko hari abandi babiri bahoze ari ba musitanteri mu ntara ya Cankuzo bamaze guhungira mu gihugu c’Urwanda mu mpera z’indwi iheze.