UNHCR isaba imiriyoni 207 z’amadorari yo gufasha impunzi z’abarundi

Ishirahamwe mpuzamakungu ryitaho impunzi UNHCR riri kumwe nabo bakorana risaba imiriyoni 207 z’amadorari yo gufasha impunzi z’abarundi zahungiye mu bihugu bihana imbibe n’Uburundi.

Nkuko umuvugizi w’ishirahamwe UNHCR yabimenyesheje iradiyo y’abongereza BBC,ayo mafaranga bayasaba mu ntumbero yo kwitegurira ibishobora gushika mu mezi atandatu ari imbere,muri Tanzaniya.

Umuvugizi wa UNHCR Karin De Gruijl yavuze ko ayo mafaranga ari igitigiri ngereranyo bakorerako,kuko bizeye ko ibintu bishobora guhinduka mu gihe amatora yoba mu Burundi,agahengwe kakaboneka.

Karin De Gruijl yavuze ko naho bariko barasaba ayo mafaranga ata menshi bararonka,ari naco gituma bariko bayasaba amakungu na cane cane ama Reta abafasha mu gihe ibihugu bihana urubibe n’Uburundi vyamaze gukora ibishoboka vyose.

Kubwo umuvugizi wa UNHCR,bazokorera ca mu gihugu ca Tanzaniya n’Urwanda kuko ariho hamaze kwibonekeza abahahungiye benshi.

Mwomenya ko Urwanda rumaze kwakira impunzi zishika ku bihumbi 27 mu gihe igihugu ca Tanzaniya kimaze kwakira abashika ibihumbi 64.