Guta ibiro kwiwe kwazanye izindi ngorane

Elora Harre yataye ibiro 55 mu myaka ibiri gusa, mu nyuma agenda guhura n’iyindi ngorane ituma adakunda umubiri wiwe.

Elora Harre afise imyaka 21 y’amavuko. Yagiye gutangura kuvyibuha cane igihe abuze se wiwe. Muri ico gihe yari afise imyaka 10 ntiyashoboye kwihaganira urupfu rw’umuvyeyi wiwe, niko gutangura gufungura cane kugira yiyibagize urwo rupfu. Uko akura niko yagiye aravyibuha cane mbere n’abaganga bamubwira ko afise ingwara yo kuvyibuha (Obésité morbide).

Mu nyuma abonye ko iyo ngwara ishobora kumuhitana, yaciye atangura gufata imfungurwa zidatuma avyibuha cane, mbere aragabanya ubwinshi bw’imfungurwa yahora afata.

Mu myaka ibiri, Elora yarataye ibiro 55, mugabo agenda kugira iyindi ngorane y’uko umubiri wiwe wahindutse cane bivuye ko yataye ibiro vyinshi mu mwanya muto cane (Umubiri wiwe waciye umera nk’uw’umusaza). Abicishije ku rubuga rwa facebook yiwe, avuga ko uguhinduka kw’umubiri wiwe atavyo yari yiteze, kandi ko bituma agira isoni z’umubiri wiwe, ugasanga bizanye ingaruka mbi nko kwiyanka mbere no mu mutwe bigahindura uko umuntu asanzwe ameze canke yiyizi.

Ubu Elora abifashijemwo n’uwo bavukana ariko aregeranye amahera kugira ashobore kwibagisha, ivyo birengako ku mubiri wiwe bimuveko.