Afganistan : Abantu bambaye impuzu z’abaganga bateye ibitaro bica abarwayi

Abantu hafi 40 bishwe mu gitero cakozwe n’abantu biyambitse umwambaro w’abaganga ku bitaro binini vyo muri Kabul, nk’uko ubutegetsi bwa Afganistani bubimenyesha.

Abagwanyi bafise inkoho n’amagerenade binjiye mu bitaro babanje guturitsa gerenade imwe mu bwinjiriro, mu nyuma bugurura umuriro ku bakozi no ku barwayi.

Abasirikare bo mu murwi w’aba "commandos" bururukiye kw’idari ry’ibitaro Sardar Daud, nibo bahavuye bica abo bagwanyi bane, babanje gutana mu mitwe amasaha menshi.

Umurwi ugendera ku vyiyumviro vya Islamu "Islamic State" (IS) wemanze ico gitero, nk’uko BBC dukesha iyi nkuru ibivuga.

Umurwi w’aba Talibani wamenyesheje ko utagifisemwo uruhara.

Abantu barenga 50 bakomeretse, nk’uko ubushikiranganji bwo kwivuna abansi bwabivuze.

Umukuru w’igihugu Ashraf Ghani yavuze ko ico gitero cibasiye ibitaro bifise ibitanda 400, ko "cahonyanze agaciro ka kiremwa muntu".

Yagize ati : "Mu madini yose, ibitaro bifatwa nka ntahangagwa, kubitera ni nko gutera igihugu cose ca Afganistani."

Umwe mu bakozi yashoboye guhunga yabonye umwe mu bateye "yambaye ikoti yera afise inkoho yo mu bwoko bwa Kalashnikov arasa uwo bahuye wese, harimwo abaraba abarwayi, abarwayi ubwabo hamwe n’abaganga".