Accueil > Amakuru > ishirahamwe > Ishirahamwe OLUCOME risaba ko ibiganiro bibera hanze bibandanya
Ishirahamwe OLUCOME risaba ko ibiganiro bibera hanze bibandanya
mercredi 21 février 2018
Mw’itangazo ryasohowe na OLUCOME kuri uno wa gatatu igenekerezo rya 21 Ruhuhuma 2018,Gabriel RUFYIRI arongoye iryo shirahamwe amenyesha ko ibiganiro bihuza abarundi bibera hanze bikenewe kugira haboneke akarusho ku masezerano y’i Arusha, mu gutsimbataza amahoro hamwe no kunywanisha abarundi.
Gabriel RUFYIRI avuga ko mu gihe icegeranyo c’ishirahamwe ryitaho ineza y’abantu OCHA kivuga ko abantu bakeneye imfashanyo ya kiremwa muntu baduze ibice 20,kw’ijana kari akaryo keza ko kwitaho ineza y’abanyagihugu
Muri iryo tangazo, ishirahamwe OLUCOME rimenyesha ko bimwe mu biganiro abanyeporitike batumirwamwo kugira bahanehane ivyiyumviro ku maradiyo n’ibimenyeshamkuru, vyerekana ko ishaka ryabo ritandukanye n’ivyo abanyagihugu bitwararitse nk’ibijanye n’ubukene,gukomeza intwaro,kugwanya igiturire hamwe n’ibindi.
Iryo shirahamwe risaba ko ivyo rishikirije vyofatirwako mu nama ihuza abakuru b’ibihugu vyo mu muryango wa Afirika y’Ubuseruko kw’igenekerezo rya 21 gushika 23 Ruhuhuma 2018, hamwe n’inama y’umurwi w’ishirahamwe mpuzamakungu ONU izoba igenekerezo rya 26 Ruhuhuma uyu mwaka.
Mu guheraheza OLUCOME ritera akamo Reta y’Uburundi kwitwararika ivyashikirijwe n’ishirahamwe OCHA kugira ikibazo c’ubukene gitorerwe inyishu.
BIKORIMANA Vianney
