SOS-Torture : Abantu 5 barishwe, 11 bakomerekera mu bitero mu kiringo c’indwi

Yanditswe na MUGISHA Van Naris
Kuya 11 décembre 2017 saa 08:52
2430
0 0

Isekeza SOS-Torture rimenyesha ko abantu 5 barishwe, 11 barakomereka,abashika 30 nabo barahagarikwa mu kiringo co kuva kw’igenekerezo rya 2 gushika kurya 9 Kigarama 2017,mu bice bitandukanye vy’igihugu.

Nk’uko biri mu cegeranyo ca SOS-Torture gisohoka uko indwi iheze, muri abo bantu 5 bishwe mu ndwi iheze, harimwo 2 biciwe muri zone ya Kanyosha iri mu gisagara ca Bujumbura.

Icegeranyo c’isekeza SOS-Torture kiragaruka kandi ku bigisha bo kw’ishuri ryisumbuye rya Komine Muhwazi, mu ntara ya Ruyigi, bahagaritswe n’igiporisi bagirizwa gushigikira abanyeshuri bariko basaba umuco ku mafaranga y’ishuri yongerejwe n’ubuyobozi.

Isekeza SOS-Torture riragarauka kandi ku gitero cabaye ku rugo rw’umukuru w’umutumba Mpishi,komie Musigati,intara ya Bubanza, aho umukozi w’umukuru w’umutumba yakomeretse, ariko akaba ata n’umwe yafashwe mu bakoze ico gitero.

Muri ico cegeranyo,isekeza SOS-torture riragaruka kandi kw’ihagarikwa rya Costantin Gisanganya, atwarwa urwaruka rw’umugambwe FNL urongowe na Agathon RWASA muri komine Gitanga, mu ntara ya Rutana, ariko rigashikiriza amakenga ko ariwe yahagaritswe weneyene mu gihe abandi bashwanye batigeze bahagarikwa.

Isekeza SOS-Torture rikamenyesha ko henshi hakozwe ubwicanyi, igiporisi c’Uburundi kitashoboye guhagarika ababikoze.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha