Uruhome rugabura Pakistan na Afganistan rugiye kwubakwa

Igisirikare co mu gihugu ca Pakistani catangaje ko gifise umugambi wo kwubaka uruhome rw’ibirometero birenga 2,600 ku mupaka uhuza ico gihugu na Afghanistani.

Umuvugizi w’igisirikare ca pakistani, General Major Asif Ghafoor yabwiye abamenyeshamakuru ko uwo mugambi ugamije kubuza kwinjira muri ico gihugu, abakoresha iterabwoba.

Nk’uko VOA ibivuga, mu kwezi guheze niho Pakistani yatangaje ubwa mbere umugambi wayo wo kwongereza umutekano mu duce twibasirwa cane n’ibitero vy’iterabwoba.

Pakistani na Afghanistani bimaze igihe bivuga ko bigiye kurushirizaho gukorana mu kurwanya iterabwoba no gusenyura ibirindiro vy’abakora iterabwoba biri mu misozi yegereye umupaka w’ivyo bihugu vyombi.

Ku ruhande rwa Afghanistani, bamenyesha ko urwo ruhome ruzogira ingaruka mbi ku ruja n’uruza rw’abanyagihugu begereye iyo mipaka.