ADISCO yahawe agashimwe kitiriwe umwami Baudouin

Ishirahamwe ryishinze guteza imbere abanyagihugu ADISCO ryararonkejwe agashimwe kitiriwe umwami Baudouin kuri uno wa gatatu igenekerezo rya 3 Ruheshi,kubera ibikorwa vyo guteza imbere Afrika iryo shirahamwe rirangura.

Ako gashimwe katangiwe mu gihugu c’Ububirigi,kangana n’amafaranga ibihumbi 200 vy’amafaranga y’abanyaburaya ni ukuvuga ayarenga gato imiriyoni 400 z’amafaranga y’amarundi ,katanzwe n’umwami w’Ububirigi Philippe ari kumwe n’umwamikazi Mathilde.

Deogratias Niyonkuru umunyabanga mukuru w’ishirahamwe ADISCO yamenyesheje ko ishirahamwe arongoye ryatowe mu yandi mashirahamwe 300,kuko rifasha abanyagihugu b’abirimizi.

Deogratias Niyonkuru yavuze ko ishirahamwe ADISCO ritandukanye n’ayandi kuko mu gihe ayandi asa n’ayatanga ibintu vya gusa,ADISCO yoyo ifasha abanyagihugu kwiyumvira bakiha ihangiro,bakaca mu mirwi begeranirizamwo amafaranga ayo nayo bakayaha umuntu umwe (ikirimba) nawe akayakoresha mu mugambi w’iterambere.

Umunyamabanga w’ishirahamwe ADISCO yavuze ko ako gashimwe baronse kazobafasha mu kwubaka kaminuza yigisha ibijanye n’uburimyi,mu gihe uburimyi aribwo bwa mbere butunze abarundi.

Mwomenya ko ako gashimwe kitiriwe umwami Baudouin kama gatangwa uko imyaka ibiri iheze,ku muntu canke kw’ishirahamwe ryaterereye bimwe biboneka mw’iterambere rya Afrika.