Ishirahamwe ry’abahungutse risaba Petero Nkurunziza kudasubira kwitoza

Ishirahamwe ry’abacitse kw’icumu bahungutse bunze ubumwe ku bw’iterambere ryuzuye kandi rirarama; basaba umukuru w’igihugu Petero Nkurunziza kudasubira kwitoza mu kibanza c’umukuru w’igihugu.

Mu kiganiro iryo shirahamwe ryahaye abanditsi n’abamenyeshamakuru kuri uyu wa 31 Ntwarante uwu mwaka, risaba umukuru w’igihugu Petero Nkurunziza kudasubira kwitoza ubugira gatatu kuko bishobora gukwega intambara mu gihugu. Ku bwa Sabushimike Obède umukuru w’ishirahamwe ARRUDID (Association des Rascapés Rapatriés Unis pour le Développement Integral et Durable) avuga ko abahungutse barushe n’ukwamana intekera ku mutwe, biyamirije ikindi kiringo ca Petero Nkurunziza umukuru w’igihugu, bakiyamiriza kandi bivuye inyuma imirwi iriko irashingwa yo gutera intambara ,u gihugu.

Muri iryo shirahamwe bavuga ko hamwe umukuru w’igihugu yovuga wenyene ko azitoreza ikibanza c’umukuru w’igihugu ubugira gatatu, bazoraba nimba bazifatanya n’abandi barundi bamaze kubivuga ko bazoja mw’ibarabara, canke bazoca mu zindi nzira zo guhagarika ico kiringo. Abo bahungutse, bakavuga ko bumviye umukuru w’igihugu akamo yabateye bagahunguka bava iyo bari baragorewe mu mahanga, inyuma y’aho abemereye ko azobabungabungira amahoro n’umutekano, bakamusaba ko yokoresha inguvu zose, mu gukingira abarundi, kugira ntibasubire guhunga, ngo basubirane intekera ku mutwe.

Iryo shirahamwe rero, rikaba risaba urwaruka kutumviriza abanyeporitike bariko barushira mu ntambara, nyabuna bibuke amagorwa abarundi batandukanye bazaniwe n’izo ntambara zurutavanako, zahitanye isinzi ry’abantu, abandi bakarwa mu buhungiro iyo bari barahungiye.