Uburundi bwasubiye kwinjira mu muhora w’Uburaruko

Uburundi bwaraye busubiye kwinjira mu muhora w’Uburaruko, ivyo bikaba vyabaye mu nama yariko irahuza abakuru b’ibihugu n’amareta mu gihugu c’Urwanda.

Muri iyo nama Uburundi bwari bwaserukiwe n’icegera ca kabiri c’umukuru w’igihugu Gerevazi Rufyikiri, Uburundi, Ethiopie n’igihugu ca Tanzaniya vyari vyayitavye nk’abarorerezi. Uburundi rero bukaba bwasubiye kwinjira muri uwo muhora inyuma y’amezi atandatu, bwaravuyemwo. Abadandaza b’abarundi rero, bakaba bagiye gusubira kuhatorera akoyokwe, mu kwinjiza ibidandazwa vyabo, biciye muri uwo muhora.

Mwomenya ko iyo nama igira icenda y’abakuru b’ibihugu bo mu karere ka EAC, yuguruwe na Paul Kagame, umukuru w’igihugu c’Urwanda, ikaba yitabwe na Uhuru Kenyatta wa Kenya, Yoweri Museveni arongoye Ubuganda, Salva Kiir wa Sudani y’Epfo, umukuru w’igihugu c’Uburundi yaserukiwe n’icegera ciwe ca kabiri Gervais Rufyikiri, Jakaya Kikwete umukuru w’igihugu ca Tanzaniya hamwe n’uwaserukiye igihugu ca Ethiopiya.