Abanyeporitike bahunze igihugu ntabudahangarwa bazoronswa

Mu gihe hari abarongoye imigambwe bahunze kandi muri abo bakaba bakurikiranwa n’ubutungane, umushikiranganji avuga ko ivyabo bizigwa bashitse mu Burundi, ariko igikuru ari uko bogaruka mu gihugu.

Edouard Nduwimana umushikiranganji w’intwaro yo hagati mu gihugu, akaba yaheruka guhamagara abanyeporitike kugira batahuke, ariko akaba yavuze ko ubudahangarwa basaba ku bakurikiranwako ivyaha mu Burundi, bitoshoboka kuko hoba hariko harasasirwa indava ikibi. Edouard Nduwimana akabandanya ahamagarira abo banyeporitike bahunze kugaruka mu gihugu c’amavukiro, kugira bitegurire amatora, bongere batunganye n’imigambwe yabo.

Bamwe mu batavuga rumwe na Reta nk’abari mu migambwe ihurikiye mu runani ADC Ikibiri nka Alexis Sinduhije na Leonard Nyangoma, bakaba barahunze, kandi bakaba bafise n’amadosiye mu butungane. Tukabamenyesha ko abasanzwe bafasha Uburundi, basaba ko abanyeporitike bahunze bogaruka, mbere co kimwe n’abatavuga rumwe na Reta bari mu Burundi, bakoroherezwa mu gukora poritike neza.