ADC Ikibiri yagiriza Reta ko ifise iyindi ntumbero yo kubacamwo ibice

Hari umurwi w’urwaruka ruri hagati y’imyaka 20 na 25 bari mu nama, bakavuga ko bipfuza impinduka muri ADC Ikibiri. Abo basore n’inkumi bakaba bavuga ko batabona aho imigambwe iri muri ADC Ikibiri iriko irabatwara, ari naco gituma bashinze urunani rwabo.

Abo basore n’inkumi rero bakaba bari badugije amabendera y’imigambwe ihurikiye muri urwo runani, abandi nabo bakaba bari bambaye udupira twiyo migambwe, n’udutambara turanga imigambwe iri muri ADC Ikibiri, bakavuga ko biyamirije uguhendwa n’abarongoye iyo migambwe.

Ku bwa Chauvineau Mugwengezo avuga ko arongoye umugambwe UPD Zigamibanga akaba n’umunyamabanga wa ADC Ikibiri, avuga ko ivyo bitabatangaje kuko ari ingendo ya Reta yo gucanishamwo imigambwe. Abagize iyo nama ntaho babazi muri ADC Ikibiri, kandi iyo mitwe yose aho itekerwa, muri ADC Ikibiri bakaba bahazi, ari naco gituma ivyo ari ibije kugira bibasamaze, ariko ataco bishobora gushikako. Imigambwe nka yose yo muri ADC Ikibiri ikaba ifise udushami aha na hariya, utwo natwo tukaba ari kugira iyo migambwe ntishobore kugira inguvu zikwiriye kugira bashobore guhangana n’umugambwe uri ku butegetsi CNDD FDD. N’aho biri ukwo rero umuvugizi wa ADC akaba avuga ko bipanze kugira baze bahiganwe n’umugambwe uri ku butegetsi.

Mugwengezo rero akaba avuga ko atangazwa no kubona abari baje kugirisha iyo nama bavuga ko bari muri ADC Ikibiri batigeze bakomwakomwa n’inzego z’igipolisi, qhubwo zari zibacungereye umutekano. Akavuga ko igihe cose ADC yashatse guhura n’abanywanyi babo bose bahurikiye mu migambwe bari kumwe batigeze boroherezwa n’ubutegetsi. Aha bakibuka ikubagurwa ryagiriwe abakenyezi bahoze bari mu nzego nkuru z’igihugu nka Marina Barampama yabaye icegera ca kabiri c’umukuru w’igihugu, Faraziya Bigirimana yabaye umushikiranganji w’ubudandaji n’amahinguriro, n’abandi.

Umuvugizi w’ADC Ikibiri rero akaba amenyesha ko muri aka kanya abo bariko biyitirira ADC Ikibiri kugira babacemwo utundi turwi, ubu bariko barashimirwa n’abari babatumye mu guhabwa amafaranga mu makomine ya Kinama na Kamenge, iyo urwo rwaruka rwari rwaje ruva.

Uburongozi bwa ADC Ikibiri rero bukaba busaba amabendera yari amanitse ahariko harabera iyo nama, kuko bashobora kuyakoresha mu busuma, bagaca bayasiga aho habereye ubwo bukozi bw’ikibi kugira buce bwagirizwa ADC Ikibiri. Ayo mabendera rero bagasaba abagiye barayabiba kuyabagarukanira mu maguru masha. Baremeza ko amabendera bagiye barabura atari make, akaba yagiye aribwa igihe baba batunganije ikoraniro, ayandi nayo akaba yagiye aramanurwa ku ngoro zabo.