Bubanza : Umusirikare w’igihugu yakubiswe arashaya n’Imbonerakure

Mu gihe abarongoye urwaruka rw’imbonerakure baherutse kubarira ikinyamakuru IGIHE ko urwaruka barongoye ruri mu bikorwa vyo kwubaka igihugu no gutsimbataza amahoro mu gihugu, ukwagirizwa ko bivanga mu bikorwa vy’’umutekano canke gukubagura abanyagihugu n’abajejwe umutekano ntibagerwe umutwe, vyasubiye kuvugwa.

Mu ntara ya Bubanza muri komine ya Gihanga ku musozi wa Buringa, igisongerezi mu gisirikare c’Uburundi afise ipete rya Adjudent Major yarakubiswe arashaya, n’urwaruka rw’imbonerakure zo mu mugambwe CNDD FDD. Abo bakubise uwo musirikare zikaba zari imbonerakure zitatu, imwe yitwa Jean Paul Nsavyimana. Uwo nyene akaba yarafashwe n’abakorana n’uwo yakubiswe, ariko nahonyene afatwa ari ukwo habanje kuba impari ndende, ubu ari mu minwe y’ubutungane, abandi nabo babiri, baciye banyika, n’ubu ntawurasubira kubakuta ijisho.

Urwaruka rw'Imbonerakure za CNDD FDD

Ivyo rero bikaba bishitse mu gihe abatari bake, y’aba abari mu migambwe itavuga rumwe na Reta yagiriza imbonerakure za CNDD FDD kwama zihohotera abantu, eka n’abari mu mashirahamwe ataho yegamiye mu vya poritike bakama basaba abarongoye umugambwe uri ku butegetsi guha intumbero urwaruka barongoye, kuko bigaragara ko mu minsi bazotandukira inzego z’umutekano nk’uko vyaraye vyiobonekeje i Buringa.

Ivyo abari mu mashirahamwe ataho yegamiye bakaba babisaba mu gihe gutoteza abanyagihugu batavuga rumwe n’abari muri CNDD FDD vyasa n’aho imbonerakure zari zababigize ubuhizi, maze ababarongoye nabo bakigira sindabibazwa nk’uko babandanya kuvyagirizwa n’abavuga ko bakubagurwa canke n’abaharanira agateka ka zina muntu mu Burundi.