Butihinda : Imbonerakure zagirizwa gutera ubwoba abo batavuga rumwe

Bamwe mu banyagihugu bo ku misozi ya Butihinda, Mugongo, Rwamfu barara ntibuca batinya ko bagirwako ibitero n’Imbonerakure za CNDD FDD, nk’uko babibwiye bagenzi bacu ba radio Isanganiro.

Abari mu migambwe itavuga rumwe n’umugambwe uri ku butegetsi CNDD FDD bo muri iyo komine ya Butihinda, bagiriza abayobozi b’uwo mugamvbwe kuba bari inyuma y’ivyo bikorwa. Izo Mbonerakure, zikaba zagirizwa kurara zirakizura, ibitera ubwoba abari mu yindi migambwe, nk’uko bivugwa na Simeon Nyandwi, wo mu mugambwe FRODEBU Nyakuri. Eka no muyindi migambwe itavuga rumwe n’uwuri ku butegetsi, ikaba yagiriza izo mbonerakure ko zibasotora, aho bavuga ko urwo rwaruka rwamanuye amabendera ya CNDD FDD, ruja kuyashinga imbere y’inzu y’abari mu yindi migambwe.

Ku ruhande rw’umugambwe CNDD FDD, umukuru w’uwo mugambwe ku musozi wa Butihinga, avuga ko ivyo ari i binyoma. Ku bwiwe, namba abanyagihugu batavuga rumwe na CNDD FDD bafise ubwoba, ni amajambo y’ibihuha bumva, atazi iyo azanana. Tukabamenyesha ko kuri uyu wa 20 Ntwarante mw’isoko ya Butihinda, abanyagihugu baremeshejwe n’abajejwe intwaro muri iyo komine.