Giharo : Impunzi zirukanwa na Tanzaniya zibayeho mu buzima bubi

Kuva impunzi z’abarundi ziba umu gihugu ca Tanzaniya zitanguye kwirukanwa, komine ya Giharo iri mu ntara ya Cankuzo imaze kwakira abirukanywe muri ico gihugu bagera ku bihumbi 14.

Abo birukanwa n’icogihugu bakaba basaba gufashwa na rirya birukanwa atakintu nakimwe bafise, ndetse no mu vyo batunze hari naho usanga atavyo barukananywe. Abo barundi rero, abakaba bavuga ko batibuka uburere bahunze bavamwo mu Burundi, mu gihe abandi nabo bavuga ko aho baba imbere bahibuka, ariko ko basanze harigaruriwe n’abandi. Ubu rero abo birukanwa mu gihugu ca Tanzaniya, bakaba bamwe bakoranirijwe muri komine ya Giharo, ikomine yagutse mu Burundi, yoshobora kwakira izo mpunzi.

Gushika ubu ishirahamwe ritabara imbabare CROIX Rouge na Ligue Iteka, akaba aribo bafasha izo mpunzi, ikindi gihe naho, bagafashwa n’abandi bahasanze kuko nabo bavuga ko ubuzima bw’uguhunga babuzi, na cane cane iyo uhunze ataco ufise. Abo bose bakaba basaba Leta ko yogarukira abo bantu bahunga co kimwe n’amashirahamwe ataho yegamiye mu vya politike.

Twobibutsa ko abo birukanwa baguma baza ku munsi ku munsi, ndetse bakaba bashikira mu ntara z’Uburundi ziri ku rubibe n’igihugu ca Tanzaniya.