Giteranyi : Aba FNL batanu bayoboka Rwasa bapfunzwe babanje gukubitwa

Abanywanyi batanu b’umugambwe FNL wigenga usanzwe uyoboka Agathon Rwasa bapfungiwe muri zone ya Ruzo muri komine ya Giteranyi.

Abo banywanyi bakaba bafashwe kuri uyu w’Imana igenekerezo rya 22 Ruhuhuma, inyuma y’aho bari bagiye kuramutsa abagenzi babo. Mu nzu abo banywanyi ba FNL wigenga usanzwe uri mu runani RANAC Dushayure Uburundi bwogorore barimwo, bakavuga ko bagiye babona Imbonerakure zitwaje ibibando hamwe n’abandi bafise imbugita, bari kumwe n’abaporisi babinjiriyeko. Bamwe mu banywanyi ba FNL bakaba baciye bayanyaga, barahunga ariko abandi batanu barafatwa, barakubitwa barashaya, nk’uko aya makuru tuyakura aho mu Ruzo abivuga.

Mu ntwaro bavuga ko abo banywanyi ba FNL bariko baragira inama batabifitiye uruhusha. Eka mbere hakaba haranafashwe na zimwe mu mpapuro z’urunani RANAC hamwe n’amasanamu ya Agathon Rwasa asanzwe ariwe arongoye urwo runani rutavuga rumwe na CNDD FDD.

Mw’ijoro ryo kuri uyu w’Imana rero, babiri kuri abo batanu bapfunzwe, bakaba baje gusohorwa n’igiporisi ariko baranka, kuko bavuga ko batari bazi iyo bagira bajanwe, ariko guca bashirwako amapingu ku maboko. Bikavugwa ko kugeza mu gatondo ko kuri uno wa 23 Ruhuhuma, bari bakiriko ayo mapingu aho bapfungiwe.