Giteranyi : Abadasigana batatu bahora bapfunzwe barekuwe

Abanywanyi b’umugambwe w’Abadasigana UPRONA muri komine Giteranyi bafatiwe bagatabwa muri yompi bagirizwa guhungabanya umutekano w’igihugu, barekuwe.

Jean Baptiste Niyongabo umukuru w’umugambwe wa Rwagasore muri komine ya Giteranyi n’umupfasoni Mariya Minani arongoye uyo mugambwe muri zone ya Ruzo hamwe na Majambere Jean Bosco, bose bari bamaze iminsi bapfungiwe mw’ibohero ry’i Muyinga, bakaba barekuwe, inyuma yaho bagirijwe kuba aribo batanze amakuru kw’iradiyo Bonesha FM, yavuga amazina y’abantu bahawe ibirwanisho muri iyo komine, ku misozi imwe imwe ya zone ya Ruzo. Bose ukwo ari batatu, bakaba baciye bagirizwa icaha co guhungabanya umutekano w’igihugu, baca batabwa mu mvuto.

Mwomenya ko inyuma y’aho abo badasigana bapfungiwe, havuzwe vyinshi, ndetse hakanavugwa umugambi wo gutegeka umupfasoni Mariya Minani ko yokwemanga ko abamenyeshamakuru, aribo bamutegetse kuvuga ko ibirwanisho vyatanzwe muri iyo komine na cane cane muri zone ya Ruzo, kugira ico caha yagirizwa kije kubavugishije iyo nkuru kw’iradiyo.