Mpanda: Umukuru w’umugambwe MSD yarakubaguwe n’imbonerakure

Umukuru w’umugambwe MSD muri komine Mpanda mu ntara ya Bubanza Alexis Hajayandi yarakubiswe arashaya n’umukuru w’imbonerakure muri iyo komine nyene ya Mpanda kuri uyu wa mbere igenekerezo rya 20 Rusama 2013.

Icababaje abatari bake mu bantu bavyiboneye, ni uko uyo mukuru w’imbonerakure yakubise uyo mukuru w’ umugambwe wa MSD ahagarikiwe n’umukuru w’ikirindiro c’abapolisi muri iyo komine ya Mpanda, mu gihe umukuru w’igipolisi c’Uburundi yari yasavye ko abapolisi bokora uko bashoboye bakagarukana icuka ciza hagati yabo n’abanyagihugu.

Alexis Hajayandi yakubiswe yagirizwa ko yagirishije inama idakurikijwe amategeko yongera ahamagara amaradiyo muri iyo komine. Ahejeje gukubitwa yaciye ashirwa mu gasho aho nyene ku mpanda, akaba yasohowe na buramatari w’intara ya Bubanza ku mugoroba w’uyo wa mbere nyene.

Umukuru w’umugambwe MSD mu ntara ya Bubanza Benjamin Ndikumana, avuga ko abatari mu mugambwe uri kubutegetsi batorohewe kuko bama bakubaguwe kenshi, agasaba ko abakora ivyo boza barashirwa imbere y’ubutungane bakabazwa kuko gukubagura abandi hari ababigize ubuhizi.