Urunani ADC Ikibiri rusaba Reta gukura ibirwanisho bizunguruka mu banyagihugu

Imigambwe ihurikiye mu runani ADC Ikibiri imenyesha ko iteye ivyatsi ubwicanyi bwahatswe gukorerwa umupfasoni wa Agathon Rwasa, Imana igakinga.

Ku bw’umushingamateka Leonce Ngendakumana arongoye urwo runani rw’imigambwe itavuga rumwe na CNDD FDD ihurikiye mu runani ADC Ikibiri, yibutsa bumwe mu bwicanyi bumaze iminsi buvugwa hamwe n’abandi bamaze kurusimba. Leonce Ngendakumana avuga nk’akarorero, iraswa rya Annonciatte Haberisoni umutambukanyi wa Agathon Rwasa Imana igakinga, umushingamateka Niyonkuru Spes asanzwe ari umutambukanyi wa General Godefroid Niyombare yahatswe kugandagurwa, abamenyeshamakuru babiri b’iradiyo Bonesha FM bafatiweko inkoho bagira bicwe Imana igakinga, abanyagihugu bishwe abandi bakanyuruzwa mu makomine ya Rumonge, Bukemba, Butaganzwa na Gihanga, hamwe n’urutonde rw’abantu bamaze kumenyekana ko bashobora kwicwa, abo nabo bakaba bahurikiye mu migambwe itavuga rumwe na CNDD FDD, abari mu mashirahamwe ataho yegamiye mu vya poritike n’abamenyeshamakuru.

Leonce Ngendakumana akavuga ko hari ubwoba budasanzwe mu banyagihugu mu gihe hasigaye iminsi mike kugira amatora abe mu Burundi. Asaba ko ibirwanisho bizunguruka mu banyagihugu, bovyakwa ku neza ya bose. Leonce Ngendakumana akaba yamenyesheje abarundi n’amakungu ko batazigera bemera ikiringo ca gatatu ca Petero Nkurunziza abanje guhonyanga amasezerano abarundi bonyene biyumvikaniye, agasaba nyabuna ko umutekano w’abantu bose wokingirwa. Abanyagihugu nabo, basabwa n’umukuru w’urunani ADC Ikibiri, kuguma bafatanye mu nda, muri ibi bihe avuga ko bitoroshe.