Urunani COPA rwatanze uwuzoruserukira mu matora y’umukuru w’igihugu

Imigambwe ihurikiye mu runani COPA yatanze Jean de Dieu Mutabazi kugira aze aruserukire mu matora.

Jean de Dieu Mutabazi asanzwe arongoye umugambwe RADEBU

Jean de Dieu Mutabazi asanzwe arongoye umugambwe RADEBU Akaba yizewe n’urwo runani yarasanzwe arongoye COPA (coalition des partis politiques pour une opposition participative), kugira aze ahiganwe mu matora y’umukuru w’igihugu yo muri uyu mwaka w’2015. Urwo runani rero rukaba ruzoshira imbere ukurwanya inzara, ico bise ‘’Faim zero’’. Mutabazi rero akaba asaba abariko barahiganirwa ibibanza mu matora, guhimiriza abo barongoye mu kwitaba amatora, kugira baze bahindure ibintu kw’ijwi ry’umunyagihugu.

Urwo runni rukaba rugize kabiri ruvuze uwuzitoza, inyuma y’umukenguzamateka Domisiyano Ndayizeye azoserukira urunani RANAC. Izindi nani nka ADC Ikibiri canke Abigenga Amizero y’Abarundi barongowe na Agaton Rwasa n’umushingamateka Karori Nditije, n’umugambwe uri kubutegetsi, bakaba bataravuga uwuzobaserukira mu matora. Abandi bamaze kumenyekana ko bazohiganwa muri ayo matora, bakaba ari bamwe mu bigenga.