Kenya: Abajejwe umutekano benshi barungitswe ahabera imyiyerekano

Yanditswe na MUGISHA Van Naris
Kuya 2 Gitugutu 2017 saa 03:30
Yasomwe : 7416
0 0

Kuva mu gatondo ko kuri uno wa mbere igenekerezo rya 2 Gitugutu 2017,abajejwe umutekano benshi barungitswe mu bibanza bitandukanye vy’igisagara ca Nairobi biberamwo imyiyerekano yo kwiyamiriza bamwe mu bagize umurwi utegura amatora IEBC, yatunganijwe n’urunani NASA rw’imigambwe itavuga rumwe n’ubutegetsi.

Iyo myirekano yatumweko na Raila Odinga, umukuru w’urunani NASA, asigura ko ariyo kugondoza bamwe mu bagize umurwi utegura amatora ngo batange imihoho imbere yuko amatora ya kabiri aba.

Abanywanyi b’urunani NASA bitezwe kuja ku biro vy’umurwi utegura amatora IEBC, aho naho abajejwe umutekano bakaba bazindutse bahakikuje mu ntumbero yo gukomeza umutekano.

Umukuru w’urunani NASA, Raila Odinga, yagabishije abajejwe umutekano, ababuza kugira uwo basinzikariza ubuzima, mu myiyerekano yo kuri uno wa mbere igenekerezo rya 2 Gitugutu 2017.

Raila Odinga avuga ko abanyagihugu barekurirwa n’ibwirizwa shingiro gutunganya imyiyerekano yo kwerekana aho bagaze mu vyiyumviro vyabo.

Yavuze ko imyiyerekano yatunganijwe ifise n’intumbero yo kwiyamiriza umugambi w’abo mu runani Jubilee rurongowe n’umukuru w’igihugu Uhuru Kenyatta wo gutunganya amategeko mashasha agenga amatora, asigura ko uteye kubiri n’ibwirizwa shingiro.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha