Kenya : Uhuru Kenyatta yatanguye uburongozi mu kindi kiringo c’imyaka itanu

Yanditswe na MUGISHA Van Naris
Kuya 28 novembre 2017 saa 04:08
11670
0 0

Umukuru w’igihugu ca Kenya Uhuru Kenyatta n’icegera ciwe William Samoei Ruto barahiriye kurongora igihugu, kur’uyu wa kabiri igenekerezo rya 28 Munyonyo 2017.

Ibirori vyatanguye nk’igihe c’isaha zitanu n’igice mu masaha yo mu Burundi, niho barahira ko bagiye kurongora igihugu ca Kenya, imbere y’abanyacubahiro batandukanye, harimwo abakuru b’ibihugu vy’akarere ka Afrika y’Ubuseruko.

Mu bakuru b’ibihugu bitavye ibirori, harimwo Yoweri Museveni w’Ubuganda, Ian Khama wa Botswana, Edgar Lungu wa Zambiya, Ismaïl Omar Guelleh wa Djibouti, Hage Geingob wa Namibiya, Faure Gnassingbé wa Togo, Mohamed Farmajo wa Somalia.

Mw’ijambo yashikirije, umukuru w’igihugu ca Kenya Uhuru Kenyatta yashimiye abanyagihugu bamutoye abizeza ko ikiringo ca nyuma atwaye Kenya kizoba ico kurwiza ubutunzi.

Uhuru Kenyatta yavuze ko abarwayi bazohora bavuzwa na Reta ku rugero rw’ijana kw’ijana, hazokwubakwa inzu zirenga ibihumbi 500 zizofasha abanyagihugu kuronka aho baba kandi hazimbutse.

JPEG - 32.6 ko
Uhuru Kenyatta, umukuru w’igihugu ca Kenya

Umukuru w’igihugu ca Kenya yamenyesheje ko kuva mu mwaka uza wa 2018, abanyafrika bose bazoba bipfuza gutembera muri Kenya, bemerewe kwinjira mu gihugu bagahabwa uburenganzira bwo kuhaba bashitse aho binjirira mu gihugu, nayo ku bava mu karere ka Afrika y’Ubuseruko bazokwinjira bakoresheje karangamuntu zabo gusa.

Mwomenya ko umukuru w’igihugu ca Kenya Uhuru Kenyatta, azoheza ikiringo ciwe mu mwaka wa 2022, bikavugwa ko ari naco kiringo ca nyuma ciwe.

Ibirori vyo kurahira kw’umukuru w’igihugu vyabaye mu gihe abayoboke ba Raila Odinga, umukuru w’abatavuga rumwe na Reta bari mu myiyerekano.

Uburundi bwari bwaserukiwe na Gaston SINDIMWO, icegera ca mbere c’umukuru w’igihugu.


Kumenyekanisha

1
INNOCENT 30-11-2017 à 09:58

Ko mutavuze perezida w’Urwanda his Excellency Kagame ????Sha abarundi murarwaye pe ! Kandi niwe agiye kuyobora African Union muri Janvier !

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha