Accueil > Kwidagadura > Amareresi > Umuntu wese asabwa kugira uruhara mu gukinga indwara yo mu kigo
Umuntu wese asabwa kugira uruhara mu gukinga indwara yo mu kigo
mardi 23 Rusama 2017
Ico kiganiro catunganijwe ku civugo : ‘’Kuvuga indwara yo mu kigo bingana gukiza ubuzima’’ mu gifaransa : PARLER DES FISTULES₌SAUVER DES VIES citabwe n’abamenyeshamakuru, abaganga, abakora mu mashirahamwe ateza imbere abakenyezi, hamwe n’abaserukiye ishirahamwe mpuzamakungu ryitaho irwirirana ry’abantu.
Mw’ijambo ryiwe, umukuru wa FESTICAB mu Burundi yashimiye ishirahamwe mpuzamakungu FNUAP ku ruhara ryagize mu gutunganya ikiganiro, mu ntumbero yo gufasha abakenyezi kwikingira indwara yo mu kigo.
Uwaserukiye ibiro vy’ishirahamwe mpuzamakungu FNUAP mu Burundi yashimiye isabukuru FESTICAB kuba ryariyumviriye ku civugo gishingiye ku gateka k’umukenyezi, kuko bimaze kuboneka ko kutavuga ingorane abakenyezi bahura nazo bituma babandanya kubangamirwa.
Uwo yaserukiye ishirahamwe mpuzamakungu ryitaho irwirirana ry’abantu yemeye ko rigiye ishirahamwe FNUAP kubandanya rishigikira isabukuru mpuzamakungu ry’amareresi mu Burundi Festicab.
Mu kiganiro yatanze, Muganga Yolanda MAGONYAGI akora mw’ishirahamwe mpuzamakungu ryitaho irwirirana ry’abantu FNUAP, yamenyesheje ko indwara yo mu kigo ari indwara ifata abakenyezi, abato n’abakuze, bava mu ntara zose ariko ko mu gihe uwuyirwaye ayivuje kare ikira neza.
Muganga Yolanda MAGONYAGI asaba uwariwe wese guterera mu gukinga iyo ndwara biciye mu kubwira uwo wese afise iyo ndwara kwegera ikigo URUMURI kiri ku bitaro bikuru vy’i Gitega cakira abafise indwara yo mu kigo.
Ikiganiro ku bijanye n’indwara yo mu kigo, catunganijwe mu ntumbero yo kubandanya indwi yahariwe kwerekana amareresi ari mw’ihiganwa ry’isabukuru mpuzamakungu ry’amareresi mu Burundi, Festicab.
MUGISHA Van
