Abafise ubumuga butandukanye buca bavurwa n’abaganga bo muri Hollande

Umurwi w’abaganga bo mu gihugu ca Hollande baritezwe kw’igenekerezo rya 17 Munyonyo uyu mwaka, aho bazoba bazanywe n’ukuvura ku buntu abagendana ubumuga butandukanye.

Ico gikorwa kizorangurirwa mu ntara zibiri z’igihugu c’Uburundi arizo Ngozi na Makamba, abanyagihugu bafise ingorane zitandukanye z’ubumuga harimwo ubumuga bamwe bavukanye, abasadutse igisenge c’umunwa, abavukanye ubujana, abafise ubumuga batewe n’ubushe, n’abandi bafise ubundi bumuga batavukanye, bakaba bazovurwa n’abo bagiraneza.

Mu ntara ya Ngozi ico gikorwa kizotangura kw’igenekerezo rya 18 gushika ku rya 22 Munyonyo, mu ntara ya Makamba naho, abo bagiraneza bakazovura abazoba biyandikishije kuva kw’igenekerezo rya 25 gushika ku rya 28 Munyonyo. Abazovurwa bose rero bakaba bategerezwa kuzoba bafise agakarata bivurizako ko kwa muganga.

Abafise ingorane z’ubumuga bavukanye canke batavukanye mu gihugu c’UBurundi bakaba bariho atari bake. Muri abo, harimwo abafise ubumuga batewe n’amasanganya, yaba ay’ubushe, amasanganya aturutse ku ntambara Uburundi buhitiyemwo, n’abandi usanga bavutse bafise ubumuga.