Abarimyi b’ikawa bo mu Burundi basa nk’abadebukiwe

Bamwe mu basanzwe bafise amashirahamwe y’amatonorero y’ikawa batumenyesha ko abarimyi b’ikawa bo mu Burundi, basa n’abadebukiwe kuko igiciro kw’isoko mpuzamakungu usanga ari gito, gurtyo bigatuma n’umurimyi ataco ahungukira.

Mu nama igira 11 y’ishirahamwe ry’ibihugu birima igiterwa c’ikawa iriko ibera hano mu Burundi guhera kuri uyu wa 13 Ruhuhuma, abasanzwe bakorera mu gisata c’ikawa baremeranya na Reta ko umwimbu w’ikawa ukiri muke cane n’uko n’abarimyi b’ikawa basa n’abadebukiwe kuko ataco bahungukira. Nk’uko bivugwa na Dieudonné Ngowembona arongoye ishirahamwe SUCCAM rifise amatonorero, umurimyi aberwa n’agahembo, mu gihe kw’isoko mpuzamakungu igiciro ari gito vyumvikana ko n’agahembo ku barimyi kaca kaba gato cane.

Ikindi naco atumenyesha ko akanovera k’ikawa y’Uburundi koba kagomba gutituka bivanye n’uko hari igihe usanga abazungu bavuga ko ifise akanovera k’ikiraya ‘’gout de pomme de terre’’, bibandanya bivugwa na Dieudonnee Ngowembona. Asaba Reta ko hokorwa ubushakashatsi kugira barabe ico bivako kugira Uburundi buzobandanye buhiganwa n’ibindi bihugu.

Prosper Merimeri Bigirindavyi umuhinga mu gisata c’ikawa akongera akaba umuyobozi ajejwe ibikorwa mw’ishirahamwe BUGESTAL nawe nyene, ingorane bazibona kumwe na mugenzi we. Abarimyi baradebukiwe ntibagikorera ikawa nk’uko bisanzwe kuko badashimishwa mu gahembo. Eka n’abahinga b’indimo baracari bake cane ku mitumba ndetse n’ubumenyi ni buke.

Mu vyokorwa rero kugira rero igisata c’ ikawa gitere imbere n’umwirimizi atere imbere, Reta yofasha cane mu kuronsa umwavu w’ikizungu ku giciro gito cane bishobotse mbere igafata mu mugongo abarimyi ijana kw’ijana. Reta yohimiriza abarimyi b’ikawa kutavanga ico giterwa n’ibindi, Reta ikongera ikabaronsa imiti ,n’ingemwe. Abarimyi kandi boronswa agashirukabute kugira baronke ingoga zo gukorera neza ikawa.