Accueil > Amakuru > Mu makungu > Amakungu arahimbaza umunsi wahariwe Nelson Mandela
Amakungu arahimbaza umunsi wahariwe Nelson Mandela
vendredi 18 Mukakaro 2014
Isi nzima irahimbaza umunsi mpuzamakungu Nelson Mandela , kuri uno wa 18 Mukakaro umunsi uhura n’italiki y’amavuko yiwe.
Mu gisagara ca Bujumbura ,ibikorwa bitandukanyevyo kwibuka uwo muhisi Nelson Mandela biza kubera mu kigo c’urwaruka ca kamenge . Ikigo BNUB hamwe n’ubuserukizi bwa Republika y’epfo mu Burundi baza gufatanya hamwe n’Uburundi mu kwibuka uwo muhisi , amezi make gusa inyuma y’urupfu rwiwe.
![](local/cache-vignettes/L672xH452/libere-apres-27-ans-de-prison-aff1c.jpg?1551555836)
Nelson Mandela akaba yamaze imyaka 67 ariko yitangira abandi ,ari umushingwamanza adasanzwe mu vy’amategeko . Ishirahamwe mpuzamakungu ONU rikaba ryifatanya n’ikigo ca nelson Mandela risaba isi nzima gufata iminota 67 yo kwibuka imyaka 67 yamaze ariko afasha abandi , mu ntumbero yo guhimbaza uwo munsi wamugenewe.
Nelson Rolihalahla Mandela ,izina Ry’ubuhizi Madiba ,yavutse kw’igenekerezo rya 18 Mukakaro 1918 i Mvezo ,yitavye imana igenekerezo rya 5 Kigarama umwaka w’2013 i Johannesbourg . Nelson Mandela yarongoye abagore batatu Graca Machel babana kuva mu mwaka w’1998 gushika umwaka w’2013 , Winnie Mandela kuva mu mwaka w’1958 gushika mu mwaka w’1996 hamwe na Evelyn Ntoko kuva mu mwaka w’1944 gushika mu mwaka w’1958. Nelson Mandela yibarutse abana batanu Makaziwe Mandela , Zenani Mandela , Makgatho Mandela , Madiba Thembekile Mandela, Zindziswa Mandela. Uwo muhisi Mandela akaba yaranditse n’ibitabu bitari bike vyiyamiriza intwaro ya karyanisha miryango.
Floxella Karire