Anvers : Ibibazo bihanze igisata c’Ubuvuzi mu Burundi vyagarutsweko

Abarundi bari hanze y’igihugu bakomeza kwiyumvirira hamwe ingene bofasha mu ngorane zihanze igihugu c’Uburundi mu gisata c’ubuvuzi gisanzwe gifise intambamyi zitari nke.

Kuri uwu wa gatandatu, mu gisagara ca Anvers mu Bubirigi, harabereye inama yahuje Abarundi baba muri ico gihugu n’abagenzi b’Uburundi, na cane cane abaganga batagira akaruhuko bahurikiye mw’ishirahamwe bise Médecins Sans Vacances (MSV), hamwe n’abarimu (bamwe bamwe), bigisha mw’ishure rya AP Artesis Plantijn Hogeschool Antwerpen, bo mu gisata cigisha abaforoma. Bakaba bariko bihweza ingorane ziri mu gisata c’ubuvuzi mu Burundi, bongera barabira hamwe icokorwa kugira izo ngorane zigabanuke, bishobotse zituzwe.

Iyo nama yatunganijwe n’ihuriro ry’Ababirigi b’abagenzi b’Uburundi, BEKRIBU (Belgische Vriendenkring van Burundi) mu rurimi rukoreshwa mu buraruko bw’Ububirigi, ribifashijwemwo n’igisagara ca Anvers. Kubwa Jean Pierre Nduwumwami, umurundi amaze igihe kirekire mu Bubirigi, arongoye iryo huriro, hari ingorane zikomeye mu gisata c’Ubuvuzi, cane cane i Muyinga n’ahandi hose mu Burundi. "Abo twita abaspécialistes ni inkehwa, kandi n’iyo babonetse, baja gukora i Bujumbura. Nk’i Muyinga, ishirahamwe OMS risaba ko (kw’isi yose) umuganga umwe avura abanyagihugu ibihumbi cumi (1/10.000), ariko i Muyinga, intara yose ijejwe abaganga (b’Abarundi) babiri ku banyagihugu bagera ku bihumbi 650. Mu baforoma nabo, benshi usanga badafise ubumenyi buhagije. Ibikoresho birabuze, ibitanda ntibikwiye kugeza naho abarwayi basigaye babavurira hasi kubera ubukene bw’ibitanda n’imatera mu bitaro, hamwe rero n’imiti ibuze."

Jean Pierre Nduwumwami (uwo uri hagati) ati : «Hari ingorane zikomeye mu gisata c’Ubuvuzi mu Burundi"

Iyo nama rero yatumiwemwo n’abaganga batagira akaruhuko basanzwe bahora basimbira gufasha mu bihugu vya Afrika (Uburundi, Kongo, Urwanda, Ubuganda n’ahandi). Bakaba nabo nyene baravuze uko basanze vyifashe i Muyinga, aho baherutse mu kwezi kwa Ndamukiza guheze. Umuganga Nele Vangheluwe avuga ko hari ingorane nyinshi, mugabo ko abategetsi muvy’ubuganga hamwe n’abaganga b’aho i Muyinga, bagerageza kuvyifatamwo neza uko bashoboye. Agasaba rero ko kubera abaganga n’abaforoma bakora umwuga ubasaba vyinshi, ko bakwiye gufatwa neza mu kubongerereza agashara.

Abari muri iyo nama biyemeje gukomeza guhimiriza abarundi hamwe n’ababirigi ko bokwitwararika gufata mu mugongo igisata c’ubuvuzi

Muganga Nele Vangheluwe arongera akemeza ko abaganga batagira akaruhuko bazoguma baja guterera umuganda mu kuvura abarundi, hamwe no kwungura ubwenge abaforoma.
Ishirahamwe BEKRIBU naryo ryiyemeza kubandanya rihimiriza abarundi bari aho mu Bubirigi hamwe n’Ababirigi bo mu karere k’Uburaruko bw’Ingoma y’Ububirigi, akarere bita Flandre, kugira bose bitwararike gufata mu mugongo igisata c’ubuvuzi mu Burundi, ari naco gituma hari n’iyindi nama itegekanijwe kubera aho i Anvers kuwa 14 Ruheshi uwu mwaka, inama izoba ivuga ivyerekeye indwara ya Sida na malaria bisanzwe biri mu ndwara zibangamiye abarundi cane kurusha izindi.

Mwomenya ko iryo shirahamwe BEKRIBU ryigeze kurungika mu bitaro vy’i Muyinga abaganga batagira akaruhuko (abaganga babiri n’abaforoma babiri), mu mwaka w’2006, naho ku mvo gushika ubu zitamenyekanye, abo baganga batemerewe kwinjira mu bitaro kugira bavure abarwayi, kandi hari no mu gihe abaganga n’abaforoma b’abarundi bari muri yegereyegere.
Mu mwaka w’2012, iryo shirahamwe ryarungitse amatoni ashika 15 y’ibikoresho vyo mu bitaro bigizwe n’ibitanda vyo ku mapine ushobora kuduza, kumanura canke kwicarika umurwayi, amamatera, intebe z’amapine z’abagendana ubumuga (chaises roulantes), imiti, n’ibindi.
Ubu naho ishirahamwe BEKRIBU rikaba rishaka gutungunya inyigisho nkarishabenge ku baforma, hamwe n’ukurungika imiti ikunda kubura aho muri ivyo bitaro vy’i Muyinga.