Bujumbura : Umuvyeyi yibarutse abana bane yaronkejwe utuganuke

Ku bitaro vy’abasirikare vyo mu Kamenge haraye habonetse igitangaza c’umukenyezi yibarutse abana bane kandi biciye mu nzira nziza (umuvyeyi atarinze kubagwa)
Umutambukanyi w’umukuru w’igihugu c’Uburundi, Denise Nkurunziza akaba yaciye yishikira kuri ivyo bitaro gukeza abavyeyi b’abo bana. Aho hari ejo ku munsi w’Imana igenekerezo rya 26 Nzero 2013.

Denise Nkurunziza, umupfasoni w’umukuru w’igihugu c’Uburundi

Mu gukeza Gilbert Bavuga na Ancila Nahimana, abavyeyi b’abo bana bane, Denise Nkurunziza yavuze ko ari igitangaza Imana yabagiriye gushika bibaruke, igitangaza Imana ikoreye igihugu c’Uburundi hamwe no ku bitaro vy’abasirikare vyo mu Kamenge vyabakiriye. Ati : "Ni imbonekarimwe hano mu Burundi".

Umutambukanyi w’umukuru w’igihugu Denise Nkurunziza akaba yaciye atanga imfashanyo y’ibikoresho vyo kwifashisha kuri uwo muvyeyi, ibirezo vy’abo bana hamwe n’ibahasha y’amafaranga agera ku 350 y’amadorare y’abanyamerika. Inyuma yo gutanga imfashanyo, akaba yaciye anasengera abo bana mukubasabira imigisha iva ku Mana nzima.

Nyina w’ivyo bibondo, Ancila Nahimana, umukenyezi w’ imyaka 35 y’amavuka, akaba yashimiye umuryango w’umukuru w’igihugu ku mfashanyo yabahaye, akavuga ko ari umunezero kuriwe kubona yashoboye kwibaruka iyo mbanyi yiwe ya kabiri yatumye akwiza abana batanu.

Mwomenya ko abo bana bane bari mu cuma kibabundikira ku bitaro vy’abasirikare vyo mu Kamenge, kuko bavutse ibiro bidakwiye neza.