Burundi: Isabukuru y’umunsi mpuzamakungu wahariwe ubuvuzi n’uwo kurwanya marariya

Isabukuru igira indwi y’umunsi mpuzamakungu wahariwe kurwanya indwara ya marariya, wahimbarijwe hamwe n’umunsi mpuzamakungu wahariwe ubuvuzi hano mu Burundi kuvy’ivugo biranga iyo minsi ibiri.

Icivugo c’umunsi mpuzamakungu wahariwe kurwanya indwara ya marariya akaba ari: “Twubake kazoza mu kurwanya indwara ya marariya”, nayo icivugo c’umunsi mpuzamakungu wahariwe ubuvuzi akaba ari “ Naho botobora uruhu n’agashinge gato, haba ingaruka nini”.

Iyo minsi mikuru uko ari ibiri ikaba yahimbajwe kuri uno munsi wa gatatu igenekerezo rya 30 Ndamukiza hano mu Burundi, muri komine Magara mu ntara ya Bujumbura Rurale. Nk’uko bishikirizwa n’ubushikiranganji bw’amagara y’abantu no kurwanya ikiza ruhonyanganda SIDA, marariya n’indwara iciha inkumbi mu kugandagura abantu batari bake kw’isi yose no mu Burundi harimwo. Kw’isi, umwana umwe kw’isaha akaba ariwe ahitanwa n’iyo ndwara ya marariya, kandi ari ndwara ishobora kurindwa igakira.

Chloé Ndayikunda, umwunganirizi w’umushikiranganji w’amagara y’abantu, amenyesha ko naho indwara ya mararira ikiri intambanyi ku bijanye n’amagara y’abantu, hano mu Burundi, hamaze gukorwa ibitari bike muri ino myaka, mu kurwanya ikiza ca marariya. Aho twovuga nk’isekeza ry’itangwa ry’imisegetera irimwo imibu yatanzwe mu gihugu, ryakozwe mu mwaka w’i 2009 n’i 2011. Hakaba hategekanijwe mbere n’irindi sekeza ryimirije mu kwezi kwa Ruheshi muri uno mwaka w’i 2014.

Mu matohozwa yakozwe, muganga Hélmenegilde Nzimenya asanzwe ari mu mugambi w’igihugu wishinze kurwanya indwara ya marariya, amenyesha ko mu mwaka w’ 2013, hibonekeje abantu bagera ku miriyoni zine bafashwe na marariya.

Ubushikiranganji bw’amagara y’abantu no kurwanya ikiza ruhonyanganda SIDA bukaba buhamagariye umuntu wese hano mu Burundi kugira ico aterereye mu kurwanya marariya imaze kwiha inkumbi ahatari hake. Bishoboka mbere, umuntu wese asabwe gukigira umutwaro wiwe mu gutera agacumu k’ubumwe mu kuyirwanya burundu mu gihugu.