Burundi : Ukutipimisha indwara ya cancer kare bituma inganda zitikira.

Mu Burundi indwara ya CANCER iri mu ndwara zihitana abantu benshi cane, kuko akenshi usanga abayirwaye bataja kwipimisha hakiri kare, nk’uko bivugwa na muganga Dominique Gacukuzi akorera mu bitaro BUMEREC, asanzwe yarakoze ivyigwa bijanye n’iyo ndwara mu gihugu ca Canada.

Kubwa muganga Gacukuzi, n’ubwo ibiharuro vy’abagwaye canke abahitwanywe n’iyo ndwara ata bihari muri kino gihe, biragaragara ko muri ino myaka 20 iheze abarwaye iyo ndwara bagiye bongerekana.

Muganga Gacukuzi avuga ko ababazwa n’ukuntu abarwayi b’indwara za cancer mu Burundi usanga bashitse kwa muganga baramaze gusinzikara, kandi iyo ndwara yari ikwiye gusuzumwa hakiri kare ikongera ikanavugwa hakiri kare kugira ntibandanye ikwiragira mu muntu.

Indwara ya Cancer rero isanzwe ifata ibice vyose vy’umubiri vyose, guhera ku rukoba, amaso, amafyigo, umutima, n’ibindi bice bigize umubiri w’umuntu. Mu gihe rero uducellules two mu mubiri dutanguye kugwirirana ata rutonde, ibice vy’umubiri bimwe bimwe bigatangura kuvyimba mu buryo budansazwe, aho umuntu aba yafashwe n’indwara ya cancer.

Muganga Gacukuzi ahimiriza abarundi kwijukira gusuzumisha iyo ndwara kuko mu gihe cose umuntu yumvise ikintu kitagenda neza mu mubiri ababara mu buryo budasanzwe kandi biba kenshi, akwiye guca aja kwisuzumisha kwa muganga.
Muganga Gacukuzi avuga ko atari ingorane y’amafaranga ituma abarundi batisuzumisha ahubwo bitumwa n’uko abarundi basanzwe bafata ibintu minenerwe. Uwo muganga abandanya asigura ko Uburundi bwohungukira ibitari bike mu gihe bwoshiraho ivyotuma, amategeko na cane cane, yo gukingira abakozi bose hamwe no gusuzuma buri igihe iyo ndwara ya Cancer.

Ariko rero, n’amategeko ntakwiye nk’uko abandanya abishikiriza, yibutsa umugambi wo gushiraho urucanco rukinga indwara ya Cancer y’igitereko mu Burundi mu mwaka w’ 2015 vyotuma ibitigiri vy’abahitanwa n’iyo ndwara bagabanuka. Mu gihe ivyo vyokorwa, Uburundi bwoba buteye intambwe co kimwe n’ibindi bihugu bisanzwe biri kumwe mu karere ka Afrika y’ubuseruko, nk’igihugu c’Urwanda, Tanzaniya hamwe n’igihugu ca Kenya.