Bururi : Ibura ry’igitoro ryakweze ikena ry’amaraso

Ibura ry’igitoro mu ntara ya Bururi, ryatumye haba ikena ry’amaraso bitumwe n’uko ikigo gisanzwe kijejwe kwegeranya amaraso, cabuze igitoro.

Ibura ry’igitoro rero rimaze iminsi ryibonekeza mu gisagara ca Bujumbura, rikaba ryaciye ritandukira n’intara zitandukanye. Mu ntara ya Bururi, bakavuga ko ahasanzwe hatanga igitoro hose, humye, atawucirirwa arajayo kukirondera. Ubuyobozi bw’ikigo kijejwe kwegeranya amaraso mu ntara ya Bururi rero, bukaba busaba abanyagihugu bo mu micungararo, kubandanya bakora ineza, mu kurokora ubuzima bw’abandi, mu gutanga amaraso, kuko kubera ibura ry’igitoro, babuze uko bashika hagati mu makomine kwegeranya amaraso.

Ariko naho ubwo bukene bwibonekeza muri iyo ntara, mw’ijoro ryo ku wa gatatu, ushira uwakane igenekerezo rya 18 Ntwarante, hakaba hafashwe amaritiro agera kuri 630 y’igitoro ari mu bibido, kuri station ya Karonda, muri komine ya Rumonge. Ico gitoro, kikaba cafashwe n’abanyagihugu bafashanije n’igiporisi. Ariko rero nyene iyo station, akaba arahira ko ico gitoro batari bakinyegeje, ahubwo akavuga ko bari bakidandaje kubarovyi, ku mafaranga 1910 kw’iritiro.