Cibitoke : Igiterwa gishasha c’ibitoke kirinda indwara

Igiterwa c’ibitoke, ni igiterwa gitunze imiryango myinshi mu Burundi, ku buryo imbere y’umwaka w’2008 kitarafatwa n’indwara mu ntara zimwe zimw,e himburwa amatoni angana n’1 600 000.

Igiterwa c’ibitoke kikaba ari igiterwa gitunze benshi mu ngo zitandukanye z’igihugu c’Uburundi, gusumba ndetse n’imyumbati canke umuceri. Ku bwa Niyongere Celestin umuyobozi w’ibiterwa vy’ivyamwa n’imboga muri ISABU, avuga ko hari indwara zitandukanye zifata ibitoke, izo nazo akaba ari banana xyanthomonas wilt, banana bunchy top virus, bunchy top du bananier, fusariose hamwe n’udukoko tubirya, izo ndwara akaba ari nazo zatumye umwimbu ugabanuka. Turetse intara nka Kayanza, Mwaro na Muramvya zitigeze zifatwa n’indara ya xyanthomonas wilt, izindi zose zararwaye iyo ndwara, nk’uko uyo muyobozi abandanya abivuga.

Uyo muyobozi muri ISABU akavuga ko nko mu ntara ya Cibitoke, hatewe ibitoke bishobora kurinda indwara ziterwa n’ubukoko. Ico gitoke citwa Yagambi kiva mu gihugu ca Repuburika iharanira intwaro rusangi ya Kongo, kikaba gishobora kwama kandi carinze indwara. Asaba abanyagihugu gukurikirana cane imirima yabo, kugira hagize igiterwa gifatwa n’akagorane ako ariko kose, bace babivuga hakiri kare mu gisata kijejwe uburimyi, mu ntumbero yo gukingira ingorane ibiterwa vyabo.