Kuki abaganga bihaniza abagore kunywa inzoga bibungenze ?

Kuva mu mwaka w’1996 igenekerezo ry’9 Nyakanga isaha zitatu, kw’isi yose barahimbaza ingaruka mbi ziterwa n’ukunywa inzoga mu gihe umuvyeyi yibungenze canke yonsa, iyo ndwara bakayita "Syndrome d’Alcoolisation Foetale (SAF)".

Iyo umuvyeyi yibungenze yihereza inzoga, zirarengana neza ingovyi ikingira umwana zikamushikira, bigakora ku bigize ubwonko bw’umwana ari vyo bituma azogira ingorane zikomeye mu gukura kwiwe. Ingorane zishobora guterwa n’izo nzoga n’uko umwana ari munda ashobora kudakura neza mu bijanye n’ibiro, imbaga (taille), ubipimo vy’ umutwe; akavuka ari magoyagi canke ataragera (prématuré). Arashobora n’ukugira ubumuga bw’ubwonko, amaso, amatwi, amenyo, amagufa, umutima, ubihimba bisohora umwanda muto (appareil urinaire), n’izindi ngaruka mbi nyinshi.

Uyu munsi mpuzamakungu wahariwe kwikingira iyo ndwara (SAF) ni ko karyo ko guhimiriza abanyagihugu bose (abakenyezi n’abagabo babo) hamwe n’abajejwe amagara y’abantu ku ngaruka mbi zishikira umwana yibungenzwe zitewe n‘uko umuvyeyi wiwe anywa inzoga.

Tukamenya ko bibujijwe cane kunywa inzoga ku muvyeyi yibungeze, yaba agisama canke haciye igihe yibungenze, kuko atanahamwe hadafise inkurikizi mbi ku mwana ari munda, arico gituma abavyeyi bokwirinda inzoga mugihe bibungenze canke bonsa.