Leta ihimiriza abanyagihugu kugarukira ibiterwa njabukamazi

Mw’ijambo yashikirije ku munsi w’ejo kuwa mbere, yibuka imyaka itatu iheze atanguye amabanga yo kuba umukuru w’igihugu ku kiringo ca kabiri, Petero Nkurunziza yahimirije abanyagihugu kugarukira ibiterwa njabukamazi bizanira amafaranga y’agaciro igihugu, batibagiye ibiterwa mbumbarugo.

"Leta nayo izofasha mu gutanga umwavu w’ikizungu ku giciro kizimbutse, aho umunyagihugu ariha ibice 40 kw’ijana gusa vy’ikiguzi c’umwavu aba aguze, Leta nayo ikamurihira ibice 60 kw’ijana."

Petero Nkurunziza yahamagariye abanyagihugu kugarukira ibiterwa njabukamazi mu gihe ibiterwa nk’ikawa umwimbu wavyo wariko uratituka, abarimyi bagasigura ko ata mafaranga bakuramwo. Abo barimyi baca bahitamwo ibindi biterwa bibinjiriza kurusha, Leta nayo igaha ihahombera.

Ku bijanye n’igiterwa c’ipampa, inyuma y’iyugarwa rya COTEBU, abarimyi ntibasubiriye kwitaho kuririma kuko umwimbu wabo munini waja muri iryo shirahamwe ryari ryugawe, uwundi ugashorwa mu makungu. Kuva aho risubiriye kwugururira, ariko kw’izina rya AFRITEXTILE, abanyagihugu basabwa gusubira kwijukira ico giterwa kiri mu vyinjiza amafaranga y’agaciro mu gihugu.